Izraıl Gazaǵa azyq-túlik apara jatqan BUU-nyń júk kóligine oq jaýdyrdy

<p>ASTANA. KAZINFORM - Birikken Ulttar Uıymynyń Taıaý Shyǵystaǵy Palestınalyq bosqyndarǵa kómek kórsetý jónindegi agenttiginiń (UNRWA) gýmanıtarlyq azyq-túlik kerýenine Izraıl áskerı-teńiz kúshteri oq atty. Bul týraly UNRWA-nyń Palestına anklavyndaǵy operatsııalar jónindegi dırektory Tomas Ýaıt H áleýmettik jelisinde habarlady.</p>

«Búgin tańerteń Gaza sektorynyń soltústigine attanǵaly turǵan azyq-túlik kolonnasyna Izraıl áskerı-teńiz kúshteri oq jaýdyrdy, baqytymyzǵa oraı eshkim zardap shekken joq», – dedi Ýaıt.

Sonymen qatar UNRWA anklavtyń barlyq bólikterine qaýipsiz kirip-shyǵý múmkindigi qajet ekenin aıtty.

"Biz oq astynda gýmanıtarlyq kómek jetkize almaımyz. Qaýipsiz jáne turaqty gýmanıtarlyq kómek barlyq jerde, sonyń ishinde Gazanyń soltústiginde de shuǵyl qajet", – delingen agenttik málimdemesinde.

Aıta keteıik, qańtar aıynyń sońynda Izraıl BUU-nyń 12 sheneýnigin HAMAS-tyń 2023 jylǵy qazandaǵy shabýylyna tikeleı qatysy bar dep aıyptaǵan bolatyn. UNRWA bul aıyptaýdan keıin birneshe qyzmetkerdi teksergenin aıtty.

Agenttiktiń bas komıssary Fılıpe Lazarınıdiń aıtýynsha, Izraılge jasalǵan shabýyldarǵa qatysy bar degen kúdiktiler qazirdiń ózinde qyzmetinen bosatylǵan.

Ótken aptada BUU Bas hatshysy Antonıý Gýterrısh UNRWA-nyń Gaza sektorynyń halqyna kómektesýde úlken róli bar, sondyqtan agenttik jumysyna kepildik berý kerek dedi.

Alaıda Izraıldiń aıyptaýynan keıin AQSh, Germanııa, Avstralııa, Ulybrıtanııa, Italııa, Kanada, Nıderlandy, Fınlıandııa, Japonııa jáne Avstrııa UNRWA-ny qarjylandyrýdy toqtatqanyn jarııalady.