Izraıl Gaza sektoryna shabýyl jasady

AMMAN. QazAqparat –Izraıl Gaza sektoryna áýeden shabýyl jasady. Shaıqas bir kún buryn Izraıldiń Iordan ózeniniń batys jaǵalaýyna jasaǵan reıdiniń saldarynan 9 palestınalyq qaza tapqannan keıin bastaldy, dep habarlaıdy QazAqparat The Times of Israel basylymyna silteme jasap.

Kýágerler men jergilikti BAQ-tyń habarlaýynsha, Izraıl Gazadaǵy nysandarǵa eki zymyran jibergen. Izraıl áskeri soqqynyń Gazanyń ortalyǵyndaǵy Magazı bosqyndar lagerinde ornalasqan jerasty zymyran zaýytyna jasalǵanyn habarlady. Bul oryn turǵyn úılermen qorshalǵan aýmaqta, BUU-nyń palestınalyq bosqyndarǵa kómek kórsetý agenttigi basqaratyn qoımadan 180 metr jerde ornalasqan.

«Shabýyl HAMAS-tyń qarý-jaraq arttyrý áreketterine aıtarlyqtaı zııan keltiredi», - delingen Izraıl qorǵanys kúshteriniń málimdemesinde.

Sondaı-aq joıǵysh ushaqtar Gaza sektorynyń soltústik bóligindegi HAMAS-tyń mańyzdy áskerı bazalarynyń birine shabýyl jasady.

Jalpy qaqtyǵystyń ýshyǵýyna Izraıl áskerıleriniń Iordan ózeniniń batys jaǵalaýyndaǵy Djenın lagerine jasaǵan reıd kezinde 9 palestınalyqtyń qaza bolýy sebep bolǵan.

Djenın shabýylyn palestınalyqtar «qyrǵyn» dep sıpattady, onda 20-ǵa jýyq adam oq jaraqatyn aldy, dep jazdy Al Jazeera.

Palestına bıliginiń habarlaýynsha, qaza tapqandar arasynda qart áıel de bar. Djenın memlekettik aýrýhanasynyń basshysy muny aýqymy men qurbandarynyń sany jaǵynan buryn-sońdy bolmaǵan basqynshylyq dep atady.