Izraıl Gaza sektorynda jańa gýmanıtarlyq úziliske daıyn

<p>Izraıl HAMAS qozǵalysymen soǵysta jańa gýmanıtarlyq úzilis pen Gaza sektoryna qosymsha gýmanıtarlyq kómek jetkizý úshin kelissózge ashyq. Bul týraly 19 jeltoqsanda 80 eldiń elshileri men dıplomattary aldynda sóılegen sózinde Izraıl prezıdenti Itshak Gertsog málimdedi. <a href="https://kaz.inform.kz/" target="_blank" rel="noopener">Kazinform</a> bul týraly <a href="https://www.timesofisrael.com/israel-ready-for-truce-in-exchange-for-more-hostages-herzog-tells-foreign-diplomats/" target="_blank" rel="noopener">The Times of Israel </a>basylymyna silteme jasap habarlaıdy.</p>

Gertsog Izraıl jáne Gaza sektoryndaǵy ahýalǵa qatysty dıplomattarmen kezdesip, brıfıng ótkizdi.

Izraıl basshysynyń aıtýynsha, soǵysta úzilis jasaý 7 qazanda HAMAS sodyrlary tutqynǵa alǵandardy bosatýdy kózdeıdi.

Birqatar BAQ Izraıldiń habarlaýynsha, «Mossad» barlaý qyzmetiniń basshysy Davıd Barnea, AQSh Ortalyq barlaý basqarmasynyń dırektory Ýılıam Berns jáne Qatar premer-mınıstri Muhammed ben Abdel Rahman ál Tanı Polshada HAMAS ókilderimen kelissózder júrgizip jatyr.

Izraıl bıliginiń málimetinshe, sodyrlardyń qolynda 7 qazanda tutqynǵa alynǵan kem degende taǵy 109 adam, sondaı-aq birneshe adamnyń denesi bar.

BUU Qaýipsizdik keńesi gýmanıtarlyq qarar boıynsha daýys berýdi keıinge qaldyrdy

Al BUU Qaýipsizdik keńesi Gaza sektoryndaǵy jaǵdaıǵa qatysty rezolıýtsııaǵa daýys berý ýaqytyn taǵy shegerdi.

Birikken Arab Ámirlikteri usynǵan bastama gýmanıtarlyq kómekti jetkizýdi jeńildetý úshin aımaqtaǵy soǵys qımyldaryn toqtatýǵa shaqyrýdy qamtıdy.

Daýys berý bastapqyda 18 jeltoqsanda ótedi dep kútilgenimen, birneshe ret keıinge qaldyryldy. Qaýipsizdik keńesine qatysýshylar qujat mátinin talqylaýda. Daýys berý 20 jeltoqsan kúni tústen keıin ótedi dep kútiledi.

Izraıl – Palestına shıelenisi

Bıylǵy 7 qazanda palestınalyq HAMAS uıymy Izraılge qarsy operatsııa bastady. Gaza sektorynan Izraılge qaraı myńdaǵan raketa ushyryldy, qarýlanǵan toptar ızraldik eldi mekenderge basyp kirdi. HAMAS bul operatsııa Shyǵys Ierýsalımde okkýpatsııalanǵan Ál-Aqsa meshitine jasalǵan shabýylǵa jáne ızraıldikterdiń palestınalyqtarǵa qarsy artyp kele jatqan zorlyq-zombylyǵyna jaýap ekenin aıtty.

Óz kezeginde Izraıl HAMAS-qa qarsy jaýapty operatsııa bastap, onyń sońy Gaza sektoryndaǵy halyqty jappaı qyrýǵa ulasty. 27 qazanda Izraıl Gazaǵa qurlyqtaǵy áskerimen soqqy jasaýǵa kóshti.

Búginde Gazanyń 2,3 mln turǵyny eksklavtyń tolyq qorshaýda qalýynan azyq-túlik, sý, dári-dármek tapshylyǵynan zardap shegip otyr. Myńdaǵan ǵımarat, sonyń ishinde aýrýhanalar, meshitter men shirkeýler zaqymdaldy nemese tolyǵymen qırady.

HAMAS pen Izraıl arasynda 24 qarasha kúni tańerteń kúshine engen «Gýmanıtarlyq úzilik» 1 jeltoqsanda tańerteń aıaqtaldy. Bul kúnderi eki tarap tutqynǵa alynǵan ondaǵan adammen almasty.

Bitim týraly ýaqytsha kelisim aıaqtalysymen Izraıl gazaǵa qarsy shabýylyn jalǵastyrdy. 

Jeltoqsan aıynyń alǵashqy onkúndigindegi málimet boıynsha, Izraıldiń Gazaǵa shabýylynan 17,7 myń adam qaza tapty.