Izraıl Gaza sektorynan áskeriniń bir bóligin shyǵardy

<p>Gaza sektorynda HAMAS-qa qarsy áskerı operatsııaǵa qatysqan birneshe myń ızraıldik ásker óz aýmaǵyna oralady. <a href="https://kaz.inform.kz/" target="_blank" rel="noopener">Kazinform</a> bul týraly <a href="https://ru.euronews.com/2024/01/01/gaza-war-mon-afternoon" target="_blank" rel="noopener">Euronews</a>-ke silteme jasap habarlaıdy.&nbsp;</p>

TsAHAL ókilderiniń aıtýynsha, jaqyn arada anklavtan bes jaýyngerlik brıgada shyǵady. Birneshe myń áskerı qyzmetker demalý jáne oqý-jattyǵý úshin óz bazalaryna oralady.

Áskerı sarapshylardyń pikirinshe, bul sektordyń keıbir aýdandarynda, ásirese soltústikte, Izraıl tolyǵymen derlik baqylaý ornatqan soǵys qımyldarynyń toqtatylǵanyn kórsetedi.

Sonymen qatar evreı memleketiniń bıligi AQSh tarapynan qysymǵa ushyrap jatyr. Olar Palestına halqyna keltirilgen shyǵyndy azaıtý úshin Izraılden áskerı operatsııany báseńdetýin talap etedi.

Izraıl armııasy jańa jyldy Gaza aımaqtaryna soqqy berýmen bastady. Shabýyldardyń birinde Izraılge 7 qazanda jasalǵan shabýyldy josparlaýǵa qatysqan HAMAS elıtalyq bólimshesiniń komandıri qaza tapty, dep habarlady Izraıl áskerıleri. Ol kezde lańkesterdiń qolynan 1200-ge jýyq adam qaza tapty, olardyń kópshiligi beıbit turǵyndar. 240-qa jýyq ızraıldik pen sheteldik kepilge alyndy. Olardyń kópshiligi áli de tutqynda.

Sodyrlardyń baqylaýyndaǵy Gaza Densaýlyq saqtaý mınıstrliginiń málimeti boıynsha, soǵys kezinde qaza tapqan palestınalyqtardyń sany 22 myńǵa jaqyndady. Ondaǵy gýmanıtarlyq daǵdarys buryn-sońdy bolmaǵan aýqymǵa jetti. BUU málimeti boıynsha, anklavtaǵy 2,3 mıllıon halyqtyń 85 paıyzy el ishinde qonys aýdarǵandar.

«Adamdar Jańa jyldy qýanyshpen qarsy alady, al biz úıden ketýge májbúrmiz. Biz kóshede turamyz jáne basymyzda baspana joq», - dep shaǵymdanady palestınalyq.