Izraıldik kompanııa Qazaqstanǵa sý tuşytý jabdyǵyn jetkizýge nıetti
Qazaqstannyń Izraıldegi Elshisi Satybaldy Burshaqov sýdy tazartý jónindegi sheshimder salasyndaǵy álemdik kóshbasshylardyń biri bolyp tabylatyn «IDE Technologies» ızraıldik kompanııasyna bardy. Kezdesýde kompanııanyń vıtse-prezıdenti Mıhael Tremer sý tuşytý qondyrǵylary men ónerkásiptik sý tazartý qurylystaryn jobalaý, salý jáne paıdalaný jónindegi múmkindikterin tanystyrdy.
S. Burshaqov turǵyndardy sapaly aýyz sýmen qamtamasyz etýdiń ózektiligin atap ótip, osy saladaǵy yntymaqtastyqtyń mańyzdy áleýetine nazar aýdardy. Osy oraıda, Qazaqstan Prezıdenti Qasym-Jomart Toqaev qazirgi zamanǵy tehnologııalardy engize otyryp, Mańǵystaý oblysynyń sý tuşytý kásiporyndaryn jańartý jónindegi jobalarǵa túıindi mán beretinin aıtty.
Kelissózderdiń jalǵasynda Mańǵystaý atom energetıkalyq kombınaty delegatsııasynyń Izraılge sapary uıymdastyryldy. Jergilikti kompanııa basshylyǵymen kezdesýde taraptar teńiz sýyn tuşytý tehnologııalary salasyndaǵy yntymaqtastyqty damytýǵa qyzyǵýshylyq tanytty, sondaı-aq qondyrǵylardy paıdalaný boıynsha tájirıbe almasty. Qazaqstandyq delegatsııa keri osmos tehnologııasy boıynsha jumys isteıtin Hadera qalasyndaǵy sý tuşytý kesheniniń óndirisimen tanysty.
«MAEK» JShS bas dırektorynyń orynbasary A. Úıkekbaev ızraıldik kompanııadan buryn satyp alynǵan sý tuşytý qondyrǵylaryn paıdalanýdyń oń tájirıbesin atap ótti. Óz kezeginde ızraıldik kompanııa Mańǵystaý oblysy ákimdiginiń jobasy boıynsha halyqtyń muqtajdyqtary úshin qýattylyǵy táýligine 24 myń tekshe metr aýyz sý tuşytý jabdyǵyn jetkizýdi uıymdastyrýǵa nıet bildirdi.