Izraılde kúnine 10 myń adam koronavırýs juqtyryp jatyr

NUR-SULTAN. QazAqparat – Álemde koronavırýs juqtyrýdyń jańa jaǵdaılary 3,4 mln asty, dep habarlaıdy QazAqparat COVID-19 taralýyna jol bermeý jónindegi vedomstvoaralyq komıssııaǵa silteme jasap.

VAK málimetinshe, koronavırýs juqtyrýdyń jańa jaǵdaılary aldyńǵy uqsas kezeńmen salystyrǵanda 300 myńǵa kóp.

«Aýrý sanynyń ósýi Azııa men Taıaý Shyǵys elderinde baıqalady. Izraılde kúnine shamamen 10 myń vırýs juqtyrý tirkeldi, bul – sáýir aıynyń basynan bergi eń joǵary kórsetkish», - delingen habarlamada.

Sondaı-aq, Eýropanyń birqatar elinde syrqattar sany kúrt ósken.

«Frantsııada jańadan juqtyrǵandar sany kúnine 50 myńnan asady, mundaı jaǵdaı sáýir aıynyń aıaǵynan beri bolmaǵan. Germanııada kúnine 80 myńnan astam adamnyń vırýs juqtyrǵany anyqtalǵan, ótken aptamen salystyrǵanda ondaǵy naýqastar sany tórtten birge artty. Al, Italııada keıingi kúnderi birden eki esege ósti», - dep kórsetilgen VAK habarlamasynda.