Izraılde ál-Farabıdiń eskertkish taqtasy ashyldy

NUR-SULTAN. QazAqparat - 15 qyrkúıekte Haıfa qalasynda Uly dala fılosofy Ábý Nasyr ál-Farabıdiń týǵanyna 1150 jyl tolýyna oraı onyń esimimen atalatyn kóshede eskertkish taqtaıshanyń ashylýy ótti, dep habarlaıdy QR SІM baspasóz qyzmeti.

Qazaqstannyń Izraıldegi Elshisi Satybaldy Burshaqov jınalǵandarǵa ál-Farabıdiń uly murasy týraly jáne onyń fılosofııa, medıtsına, quqyqtaný, psıhologııa, kosmologııa jáne basqa da salalardyń damýyna qosqan úlesi týraly aıtyp berdi. Sondaı-aq, S.Burshaqov eskertkish taqtanyń ashylýy eki el arasyndaǵy mádenı baılanysty odan ári nyǵaıta túsetinine toqtaldy.

Haıfa qalasy meriniń orynbasary Lazar Kaplýn óz sózinde ál-Farabı kóshesine ornatylǵan eskertkish taqta qaladaǵy arab jáne evreı kvartaldary túıisken jerde ornalasqanyn jáne mádenıetter birligin bildiretinin atap ótti.

Evreı oıynyń zertteýshisi, Izraıl Ashyq ýnıversıtetiniń doktory Ýrı Gershovıch tyńdaýshylarǵa Táýrattyń kórnekti aýdarmashylarynyń biri ravvın Moshe ben Maımon óz shyǵarmalarynda ál-Farabıdi óziniń «rýhanı ustazy» dep jıi ataıtynyn jetkizip, qazaq jáne evreı halqynyń rýhanı baılanysyn eske túsirdi.

Іs-shara qorytyndysy boıynsha Elshi S.Burshaqov Haıfa meri Eınat Kalısh-Rotemmen kezdesip, ekonomıkalyq jáne mádenı baılanystardy talqylady.

Yntymaqtastyqtyń qalyptasqan deńgeıi jáne Qazaqstan men Izraıl arasyndaǵy taýar aınalymynda Haıfanyń rólin eskere otyryp, Haıfa men Qazaqstan qalalarynyń arasynda baýyrlastyq baılanys ornatý týraly kelisildi.

Іs-sharaǵa qala ákimdigi, dıplomatııalyq korpýs jáne ǵylymı toptardyń ókilderi, Haıfada oqıtyn qazaq stýdentteri qatysty.

Ál-Farabı kóshesi 1960 jyly Haıfanyń arab kvartalynda ashylǵan. Ol áıgili Bahaı baqtary men Haıfa óner murajaıyna jaqyn mańyndaǵy tarıhı aýdanda ornalasqan. Onyń uzyndyǵy 1,5 km quraıdy.