Izraıl áýe kúshteri Damaskige soqqy jasady

AMMAN. QazAqparat – Izraıl áýe kúshteriniń Damaskige jasaǵan soqqysy saldarynan bes adam qaza taýyp, 15 adam jaralandy, dep habarlaıdy QazAqparat tilshisi sırııalyq SANA agenttigine silteme jasap.

«Jeksenbi kúni saǵat 00:22-de Izraıl áskeri Sırııanyń okkýpatsııalanǵan Golan aımaǵy jaǵynan zymyran tolqyndarymen áýe shabýylyn jasap, Damask qalasy men onyń mańyndaǵy keıbir núktelerge, sonyń ishinde turǵyn úı massıvterine soqqy berdi. Áýe qorǵanysy zymyrandarǵa tosqaýyl berip, kópshiligin atyp túsirdi», - dep habarlaıdy basylym sırııalyq áskerı derekkózge silteme jasap.

Aldyn ala málimet boıynsha, shabýyl nátıjesinde bes adam, onyń ishinde áserı qyzmetker qaza taýyp, 15 beıbit turǵyn jaralanǵan, olardyń keıbiriniń jaǵdaıy aýyr.

«Damask pen onyń aınalasyndaǵy birneshe turǵyn úı men birqatar aýdanǵa zaqym keltirdi», - delingen Sırııa armııasynyń málimdemesinde.

Reuters-tiń aqparatynsha, Izraıldiń soqqylary Damaskiniń ortalyǵyndaǵy Kafr-Sýz aımaǵynda ırandyq nysandarǵa jaqyn ornalasqan, jaqsy kúzetiletin qaýipsizdik kesheniniń janyndaǵy ǵımaratqa tıgen. Sondaı-aq, Damask qalasynyń ortalyǵyndaǵy Omeııadtar alańyna jaqyn jerde, adamdar kóp shoǵyrlanǵan aýdanda birneshe ǵımarat zaqymdandy.

Al-Jazeera-nyń habarlaýynsha, «Jeksenbidegi soqqy – Sırııa astanasyna jasalǵan Izraıldiń eń qaýipti shabýyly», - dedi «Adam quqyqtary jónindegi Sırııa observatorııasynyń» basshysy Ramı Abdel Rahman.

Budan bir aıdan astam ýaqyt buryn Izraıl Damask halyqaralyq áýejaıyna soqqy bergen edi, ol joly tórt adam, onyń ishinde eki sarbaz qaza tapqan.