Izmırdegi zilzala: Qazaqstandyq jýrnalıst Túrkııa halqy apat saldarymen qalaı kúresip jatqanyn aıtyp berdi
«Túrkııa úkimeti janyndaǵy Tótenshe jaǵdaıdyń aldyn alý jáne joıý basqarmasynyń (AFAD) 2 qarasha kúni saǵat 11.29-da bergen málimeti boıynsha, zilzaladan qaıtys bolǵandar sany 83-ke, jaralylar sany 962-ge jetti. Qazir qıraǵan 6 ǵımaratta qutqarý jumystary júrgizilip jatyr. Jaralylardyń 743-i jeńil jaraqatpen qutylsa, 219-y aýrýhanaǵa jatqyzylǵan, onyń 9-y jansaqtaý bóliminde, 4-eýi óte aýyr halde», - deıdi Ásel Qaırolla.
Jýrnalısttiń aıtýynsha jalpy Izmır ǵana emes, Túrkııanyń barlyq óńiri seısmologııalyq apatty aımaqqa jatady. Byltyr eldiń shyǵys jaǵynda da úlken jer silkinisi bolǵan. Al bıyl Izmırde ǵana emes, Ystanbul, Ýshak, Aıdyn degen aımaqtarda da zilzala tirkelgen. Alaıda epıtsentr Izmırde bolǵandyqtan jer silkinisiniń eń qatty zardabymen osy qalanyń turǵyndary betpe-bet kelgen.
«Aftershoktar áli de bolyp jatyr. Izmırde osy úlken zilzaladan beri 1143 ret terbelis anyqtalǵan. Eń úlkeni – 5 balǵa jetken. Maǵan osy jaqta oqyp jatqan stýdentterdiń týystary, jalpy kóp kisiler habarlasyp, ýaıymdap jatyr. Qazaqstannyń Túrkııadaǵy elshiligi jaqsy kómektesip jatqanyn aıta ketý kerek. Birden bárimizge habarlasyp, Izmırdegi Qazaqstannyń azamattary men stýdentterin túgendep, shuǵyl áreketke kóshti. Zardap shekken eshkim joq. Tek qazaqstandyq stýdentter turatyn jekemenshik jataqhananyń bir qabyrǵasy jarylǵan eken. Ystanbuldaǵy bizdiń konsýldyq basqa jataqhanamen sóılesip stýdentterimizdi sol jaqqa ornalastyrdy. Qatty qaýip joq», - degen Ásel Qaırolla ınternette tarap ketken sý basyp jatqan jerler men qulap jatqan úılerdiń fotosýretterine qatysty pikirin bildirdi.
Zilzala Izmırdegi eki aýdanda tirkelgen. Bornovo degen aýdanda 2 ǵımarat qulasa, Baırakly degen aýdandaǵy eski ǵımarattardyń kóbi qıraǵan.
«Jalpy Baırakly – Izmırdegi problemalyq aýdan. Kezinde ol aýdanda ruqsatsyz úıler óte kóp salynǵan. Keıin ondaǵy bılik sol úılerdi súrý týraly sheshim qabyldaǵan kezde, sondaǵy azamattar kóp shaǵymdana bastaǵannan keıin úıler sol betinde qalypty. Al qalanyń bas josparynda ol aýdandy jańartý jumystary bar-tyn. Izmır, Aıdyn ólkelerinde qazan-qarasha aılarynda jer silkinisi jıi tirkeledi. Biraq eń joıqyny – osy joly bolyp tur. Jalpy Túrkııada júrgenime 2 jyldaı bolyp qaldy. Buryn zilzala ary ketse 5 sekýndtqa ǵana sozylatyndaı kórinetin. Ózime osy joly 1-1,30 mınýttaı terbelip turǵandaı sezildi. Biraq mamandar 45 sekýnd terbelgenin jarııa etti», - deıdi otandasymyz.
Jýrnalıst sonymen qatar Túrkııadaǵy bılik zilzalanyń saldarymen qalaı kúresip jatqanyn aıtyp ótti.
«Bizdiń elde apat tirkelse jaýapty mınıstrlikter nemese Prezıdent osyndaı qarajat bólinedi dep aıtady da, sol qarajattyń bólinetini belgili. Al Túrkııada apat jaǵdaıynda ár mınıstrlik, ár oblys óz betimen bıýdjetten qarajat bólýge quqyly. Sondyqtan ár mınıstrlik shamalary kelgenshe kómek kórsetýde. Mysaly ótken jumada Túrkııanyń Otbasy jáne áleýmettik qyzmet kórsetý mınıstrligi 5 mln lıra bólse, búgin taǵy 5 mln lıra jiberemiz dep otyr. Sonymen qatar memlekettik bıýdjetten úıinen aıyrylǵan ár otbasyǵa qaýipsiz aımaqtan úı jaldaý úshin, jaǵdaılary túzelgenshe 5 myń lıra aýdarylady. Sodan keıin eshqandaı zattaryn ala alyp shyǵyp úlgermegenderge bir rettik tártipte 30 myń lıra beriledi», - deıdi ol.
Izmır qalasynda qazirgi ýaqytta baspanasyz qalǵan otbasylardy ýaqytsha panalatý úshin ashyq alańdarda 3545 shatyr qurylǵan. Olarǵa 24 382 kórpe, 13 280 tósek, 5 500 tósek-oryn, japqysh, 2 657 as úıge qajetti jabdyqtar jáne turaqty as-aýqat jiberilip turady. Shatyrlar qurylǵan jerlerdiń mańaıyna dárethanalar men sýǵa túsetin oryndar da ornatylyp jatyr.
«Jer silkinisinen 65 saǵattan soń - jańa ǵana bir úıdiń astynan 3 jasar qyz qutqarylypty. Jaraly eken. Habar taraǵan jarty saǵattyń ishinde Ystanbul Tótenshe jaǵdaı boıynsha qutqarý otrıadyn jiberdi. Adana alys bolsa da olardyń da qutqarýshylary jyldam jetti. Jalpy túrikterdiń uıymshyldyǵyn erekshe atap ótkim keledi», - dep túıdi Ásel Qaırolla.
Fotosýretter sabah.com.tr saıtynan alyndy.