Іzgilik órisi

ASTANA. 8 qarasha. QazAqparat /Qanat Sultanov/ - «Birligimiz jarasqan!» - bul urandy QR Prezıdenti memleketimizdiń órkendeýi úshin halyqtyń barlyǵyn jumyldyrý qajettiligi týraly aıta kelip, «Nur Otan» HDP saıası keńesi bıýrosynyń keńeıtilgen otyrysynda alǵash ret jarııa etken edi.

Birneshe aıdan soń eldegi úkimettik emes uıymdardyń basym bóligin biriktiretin Qazaqstannyń Azamattyq alıansy bul urandy jalǵastyryp áketti.

2010 jyldyń sáýir aıynda Temirtaý qalasynda sport alańyn ózderi qalpyna keltirýge tyrysqan oqýshylardyń bastamasyna Qazaqstan azamattyq alıansynyń úkimettik emes uıymdar odaǵy qoldaý bildirdi. Qazaqstan Prezıdentiniń tikeleı qoldaýymen «Birligimiz jarasqan!» atty aýqymdy is-shara ótkizý týraly sheshimdi qabyldaǵan da solar edi.

Mysalǵa, Almaty qalasynda osy joba aıasynda 2011 jyly ótetin Azıadaǵa qoldaý bildirý úshin birneshe is-sharalar uıymdastyryldy. Aktsııalar arasynda qala ákimi Ahmetjan Esimovtyń qatysýymen ótken velojarys, taýda júretin velosıpedter arasyndaǵy jarys, strıtbol, jaǵajaıdaǵy voleıbol men júgirý boıynsha ótkizilgen jarystar bar.

Astanadaǵy «Ózen patrýli» aktsııasyna «Jasyl el» jasaqtary men eriktileri qatysyp, qaladaǵy jaǵajaılarda sýǵa batqandardy qutqarý boıynsha nusqaýdan ótti. Odan keıin olar ortasha bilim berý mekemelerine, mektepterge, gımnazııalar men lıtseılerge baryp, oqýshylarǵa shaǵyn dárister oqydy. «Mańǵystaý qutqarýshylary» atty osyndaı aktsııa Aqtaýda da uıymdastyrylǵan.

Al Atyraýda alǵash ret qulaqtary nashar estıtin jandarǵa vıbratsııalyq qońyraýy bar uıaly telefondar tabys etilgen «Sheksiz qarym-qatynas» aktsııasy ótti. Keıin Oral qalasynda da bul ıgi is jalǵasyn tapty. Taldyqorǵanda uıaly telefondardan tys, estý apparattary qosa tabys etildi.

Qazaqstannyń Azamattyq Alıansynyń ókilderi ózderiniń dittegen maqsattaryna jettik degen oıda, olar ár baǵyttaǵy úkimettik emes uıymdardyń kúsh-jigerin ortaq mindetti sheshýge biriktirdi. Al Elbasymyz N.Nazarbaev bul naýqannyń jaqsy áleýeti bar ekenin kórdi.

Elbasynyń pikirinshe, bul kez kelgen órkenıetti qoǵamnyń mańyzdy quraýshysy bolyp tabylatyn azamattyq turǵydan ózin ózi tanýdy qalyptastyrýdy jalǵastyratyn uzyn joldyń basy ǵana.

Betalysymyz jaqyn arada Qazaqstanda «birligimiz jarasqan!» naýqynynyń ekinshi tolqyny bastalyp, qazaqstandyqtar óz yntasyn tanyta alady degendi kórsetip otyr. Qoryta aıtqanda, biz ben keler urpaǵymyzdyń qandaı elde ómir súretindigi árqaısysymyzǵa baılanysty.