Izendi – ulttyq ónerdi nasıhattaıtyn, araq-sharap satylmaıtyn aýyl

QARAǴANDY. QazAqparat – Qaraǵandy oblysynń Izendi aýylynda aqsaqaldar jas urpaqqa ulttyq ónerdi nasıhattap, qazaq halqynyń sport túrlerine baýlıdy. Jylqyny quryqtap, kókpar tartatyn jastar qatary aýyldy jyldan jylǵa kóbeıip keledi, dep habarlaıdy QazAqparat tilshisi.

Úıir-úıir jylqyny shurqyratyp, asaýdy arqansyz quryqtaıtyn jigitter en dalada júr. Izendi jastary jastaıynan jylqy jalynda oınap, Qambar ata balasyn janyndaı jaqsy kóredi. Ásirese shalma salǵanda aldaryna jan salmaıdy.

«Shalma salǵan jeńilirek quryqqa qaraǵanda. Quryqtaýdyń beıneti kóp, biraz júgirý kerek bolady. Shalma salý úshin Almaty qalasyna sapaly arqanǵa tapsyrys berdik. Onyń ortasyndaǵy sheńberdi ózimizge yńǵaıly etip jasaımyz. Jylqy qaı jerge, qandaı qashyqtyqqa qashatynyn jobalap ólshep, aınaldyryp jasap alamyz. Uzyndyǵyn da óz yńǵaıymyzǵa qaraı ólsheımiz», - deıdi Izendi aýylynyń turǵyny Erkebulan Ybyraı.

Toptyń arasynan tańdaǵan tulparyńa dóp túsý ońaı emes. Eger en dalany erkin jortqan, quryq kórmegen jylqy asaý bolsa, onyń jóni tipten bólek. Degennmen attyń qulaǵynda oınaıtyn Erǵanat Taıjanov asaýǵa tusaý sala aldy.

«Jylqynyń asaý nemese jýas bolǵanyna qaramaımyz. Shalma salǵanda biz arqanda eshýaqytta jibere salmaımyz. Mingen atymyzdyń taqymyn basyp tez toqtata qalamyz. Sondyqtan atpen júrip shalma salsaq, ustaıtyn jylqymyzdyń asaý bolǵany biline qoımaıdy. Eń bastysy shalmany sheńberlete úıirip otyryp laqtyrý kerek. Sol kezde kózdegen jylqyǵa dóp túsedi. Jyl saıyn aýylǵa úıir-úır jylqy kelgende, úlken kisiler taı, jabaǵylaryn ustap berýdi ótinedi. Solardy quryqtaımyz. Sodan olar batasyn berip ketedi», - deıdi Erǵanat Taıjanov.

Izendi aýylynyń sáıgúlikte shapqan jastarynan keń dalanyń kemerlengen keskinin ǵana emes, keńdigin, saf ónerdiń móldirin, qazaq balasynyń órligin kóresiń. Mundaǵy eńbektegen baladan eńkeıgen qarııaǵa deıin ulttyq ónerdi nasıhattaıdy. Tek naýryz meıramynda ǵana emes ár úıdiń otbasynda bolatyn qyzyq toı dýmanda mindetti túrde «Alaman báıge» uıymdastyrylady.

Aýyl jastary kókpar sportyn Izendi tórinde ulyqtap júr. Jankúıerler delebesin qyzdyratyn bul oıynǵa qyzyǵýshylyq joǵary. Marqasqa ji­gitterdiń shabysynda, serke tartysynda kem­shilik joq deıdi mamandar.

«Ár aýyl óz jetistikterimen maqtansa, bizde de óz sportshylarmyzdy maqtan etemiz. Osy ulttyq sport túrinen úsh dúrkin chempıonymyz bar. Sonymen qatar aýl, aýdan, oblastyq jarystarda aýdaryspaq, kókpardan aldyńǵy oryndarda kórinedi jigitterimiz. Jastaıynan barlyǵy atqa minip, kóshede bos júrmeı, bir birin sporttyq oıyndarǵa baýlyp, úıretip júredi», - deıdi Izendi aýylynyń ákimi Aıdos Muratuly.

Nura aýdanyna qarasty Izendi aýylynda 700 den astam halyq bar. Salaýatty ómir saltyn saqtaýda eldi mekende barlyq jaǵdaı jasalǵan.

Naýryz aıynan bastap Izendidegi saýda ortalyqtarynda araq sharap satylmaıdy. Turǵyndardyń ishimdiksiz aýyl bastamasyna kásipkerler de qoldaý kórsetýde. Endi jas ta, jasamys ta salaýatty ómir saltyna birjola den qoımaq.