Іzdeýde júrgen 11 adam Qyrǵyzstannan Qazaqstanǵa ekstradıtsııalandy - Bas prokýratýra

ASTANA. QazAqparat - Qazaqstan Respýblıkasynyń Bas prokýrory Qaırat Qojamjarov Qyrǵyz Respýblıkasynyń Syrtqy ister mınıstri Otqyrbek Jámshıtovpen ekijaqty kezdesý ótkizdi, dep habarlaıdy QazAqparat tilshisi.

Áriptester vedomstvoaralyq yntymaqtastyqty nyǵaıtý jáne quqyqtyq bazany keńeıtý jumystaryn talqylady.

Kezdesý barysynda transulttyq qylmysqa, ekstremızm jáne terrorızmge qarsy turýdaǵy konstrýktıvti qarym-qatynas, sondaı-aq urlanǵan aktıvterdi qaıtarý jónindegi birlesken kúsh-jigerge oń baǵa berildi.

«Úılestirilgen senim sharalary qylmystyq ister boıynsha jedel ári áýre-sarsańsyz quqyqtyq kómek kórsetý týraly Kıshınev konventsııasyn júzege asyrýǵa múmkindik beredi», - dedi Qaırat Qojamjarov.

Óz kezeginde Otqyrbek Jámshıtov sottalǵandardy tapsyrý turǵysynda qol jetkizilgen ózara nátıjelerdi atap ótti. Sońǵy 2 jylda Qyrǵyzstannan Qazaqstanǵa 11 adam ekstradıtsııalanyp, qyrǵyz tarapyna 17 adam tapsyrylǵan. Osy ýaqyt aralyǵynda Qazaqstan Qyrǵyzstanǵa 19 sottalǵan azamatty tapsyrsa, bizdiń elge 3 qazaqstandyq ekstradıtsııalanǵan. 

Terrorıstik uıymdarmen jáne olardy qarjylandyrýmen kúres salasyndaǵy yntymaqtastyq qyrlary jeke qozǵaldy. Bas prokýror óziniń sheteldik áriptesin ekijaqty qatynasty odan ári keńeıtýge daıyn ekenine sendirdi.

Esterińizge sala keteıik, Astanadaǵy «Óńiraralyq yntymaqtastyqty nyǵaıtý jáne uıymdasqan qylmysqa qarsy kúreste kúsh-jigerdi úılestirý» halyqaralyq konferentsııasyna shet memleketterdiń qadaǵalaý organdarynyń ókilderiniń qatysýy aıasynda Bas prokýror Qaırat Qojamjarov birqatar ekijaqty kezdesýler ótkizgen bolatyn.