IYU elderi basshylary Astanadaǵy sammıtke qatysady

ASTANA. QazAqparat - 2017 jyldyń 10-11 qyrkúıeginde Astanada ǵylym men tehnologııa baǵytynda Islam yntymaqtastyǵy uıymynyń sammıtin ótkizý josparlanyp otyr. Bul týraly búgin Parlament Májilisiniń jalpy otyrysynda «Islam Konferentsııasy Uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisimdi ratıfıkatsııalaý týraly» zań jobasyn tanystyrý barysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

Osy oraıda mınıstr Qazaqstanǵa tájirıbe almasý men tehnıkalyq múmkindikter úshin jaǵdaı jasalyp, aldyńǵy qatarly sarapshylar tartylyp, birlesken zertteýler júrgizýge jol ashylatynyn atap ótti.

Óz kezeginde QR Syrtqy ister mınıstriniń orynbasary Aqylbek Kamaldınov atalǵan sammıtti ótkizý bastamasyn bastapqyda IYU bas hatshysy kótergenin, sharany Pákistan uıymdastyrýy tıistigin jetkizdi. Alaıda bul el ózine osy mindetti alýǵa qaýqarsyz boldy.

«Qazaqstan Prezıdenti Nursultan Nazarbaev sammıtti ótkizý boıynsha barlyq mindettemeni alý týraly sheshim qabyldady. Osy oraıda sharany uıymdastyrý turǵysynda jumys josparyn bekitti. Bul baǵyttaǵy jumystar boıynsha Syrtqy ister mınıstrligi negizgi ázirleýshi bolyp tabylady. Sammıtti ótkizgenge deıin aǵa laýazymdy tulǵalardyń birqatar keńesteri ótedi», - dedi Kamaldınov.

Sonymen qatar ol atalǵan sharanyń qarsańynda QR Bilim jáne ǵylym mınıstrliginiń qamqorlyǵymen úlken ǵylymı-tájirıbelik konferentsııa uıymdastyrylatynyn atap ótti.

«Sammıtke memleket basshylary shaqyrylyp otyr. Qazirgi kezde qatysatyndyǵyn rastaǵan elderdiń tizimin quryp jatyrmyz. Búginde sharaǵa keletindigin 10 memleket maquldady», - dedi vıtse-mınıstr.