IV AEF aıasynda «Damý» kásipkerlikti damytý qory» AQ «Ǵalamdyq ekonomıkadaǵy kásipkerlik» atty jalpy sessııa uıymdastyrady

ASTANA. 26 sáýir. QazAqparat - Ústimizdegi jylǵy 3-4 mamyr kúnderi Astana qalasynyń Táýelsizdik saraıynda ótetin IV Astanalyq ekonomıkalyq forým (AEF) aıasynda «Damý» kásipkerlikti damytý qory» AQ shaǵyn jáne orta bıznestiń daǵdarystan keıingi damý máselelerine arnalǵan arnaıy sessııa ótkizgeli otyr, dep habarlady «Damý» kásipkerlikti damytý qory» AQ baspasóz qyzmeti.

Bul shara Qazaqstan Úkimeti men «Eýrazııalyq ekonomıkalyq ǵalymdar klýby» qaýymdastyǵynyń qoldaýymen uıymdastyrylmaqshy.

Astanalyq ekonomıkalyq forým el ekonomıkasynyń jáne onyń jekelegen salalary men sektorlarynyń damý barysy týraly meılinshe ótkir máseleler talqylanatyn tanymal alańǵa aınalyp otyr. Ekonomıkaǵa memleket tarapynan kórsetiletin qoldaý sharalarynyń nátıjeleri, ádisteri men tıimdiligi - ár forým saıyn negizgi taqyryp retinde talqyǵa túsip keledi.

Al osy jyly IV AEF aıasynda shaǵyn jáne orta bıznes máselelerine arnalǵan jalpy sessııany «Damý» kásipkerlikti damytý qory» AQ ótkizedi. Mundaı bastamanyń ózekti bolatyn orny da bar. Qazaqstan ekonomıkasy, jalpy alǵanda, onymen birge jeke sektorlar men kásiporyndar álemdik qarjy daǵdarysy saldarynan es jıyp, damýdyń jańa, daǵdarystan keıingi kezeńine bet aldy. «Damý» qory kásipkerlikti memlekettik qoldaý baǵdarlamalaryn iske asyrýdaǵy basty operator jáne «Bıznestiń jol kartasy-2020» Úkimettik baǵdarlamasynyń qarjy agenti retinde, osy merzim aralyǵynda shaǵyn jáne orta bıznes naryǵynyń ahýaly týraly tolyq qamtylǵan aqparat jınady. Otyrys aıasynda «Damý» qorynyń basshylyǵy men mamandary naryqtyń daǵdarysty qalaı eńsergenin jáne damýdyń jańa, daǵdarystan keıingi kezeńine qalaı kelgenin kórneki túrde kórsetetin egjeı-tegjeıli marketıngtik zertteýdiń nátıjelerin de usynatyn bolady.

Búginde qazaqstandyq kásipkerlikke onyń ári qaraı gúldenýi úshin jańa damýynyń tetikteri qajet. Sessııa barysynda bıznesti odan ári qoldaý ádisteri qyzý talqyǵa salynbaq. Sonymen qatar, osy naryqtyń jaqyn jáne keıingi jyldarǵa ekonomıkalyq ahýaly boıynsha boljamdar keltiriledi.

Ekonomıka jáne álemdik bıznes problemalary boıynsha uzaq ýaqyttan beri qomaqty zertteýler júrgizip kele jatqan sheteldik jetekshi sarapshylardyń pikirleri «Damý» qory sessııasynyń mańyzdy taqyryptarynyń biri bolyp tabylady. Arnaıy shaqyrylǵan álemdik deńgeıdegi bedeldi spıkerler óz baıandamalarynda damyǵan jáne damýshy elderdegi kásipkerlikke járdemdesý tájirıbesi týraly keń maǵlumat berip, oı-pikirlerin ortaǵa salady.