Itti baptaı bilseń, senimdi serigińe aınalady — kınolog

<p>ORAL. KAZINFORM — BQO polıtsııa departamentine qarasty kınologııalyq qyzmet ortalyǵy qylmystyń aldyn alýda, ashýda, esirtki qylmystaryn anyqtaýda, qylmyskerlerdi izdestirý men ustaý, sonymen qatar qoǵamdyq tártipti saqtaýda arnaıy daıyndyqtan ótken ıtterdi paıdalanady.</p>

Kınologııada ıttiń tuqymyna úlken mán beredi. Munda nemis ovcharkasy, belgııa ovcharkasy, labrador degen túrleri bar. Mundaı ıtter úıretýge beıim ári shydamdy keledi.

Keıde olardy úıretý bir jylǵa deıin sozylady. Daıyndaýy men beıimdeýine qaraı olardy túrli baǵytta paıdalanady.

Qazirgi tańda kınologııa qyzmetiniń odorologııa bóliminde psıhoaktıvti zattardyń ıisin izdep, anyqtaı alatyn ıtter bar.

Olar tek izdeýge ǵana qatyspaıdy. Sondaı-aq qyzmettik ıttermen birge kınologtar esirtki kontrabandasyn anyqtaý úshin poshta jóneltilimderin únemi tekserip otyrady.

Sol bólimniń kınolog-mamany, polıtsııa kishi serjanty Erjan Qýanyshev jastaıynan ıttiń tilin túsinip, kútip-baptaýdy úırengen. 

Qasyndaǵy senimdi dosy «Don» esimdi nemis ovcharkasymen osy bólimde qyzmet atqaryp keledi.

Budan birneshe jyl buryn Erjan Samatuly sýǵa batyp bara jatqan qos balany qutqaryp qalǵan bolatyn. 

Onyń aıtýynsha, bul qyzmet úlken jaýapkershilikti, tııanaqtylyqty, eńbekqorlyqty talap etedi. 

«Kınolog bolý úshin ıtke bar mahabbatyńdy berý jetkiliksiz. Olardy kúshik kezinen bastap úıretesiń, ósiresiń, daıyndaısyń. Ol iske shydamdylyq kerek. Onyń tamaǵyn toıdyryp, sýyn berýmen is bitpeıdi. Jańa týǵan balany qalaı mápeleseń, olarǵa da dál sondaı janashyrlyq qajet. Qalaı úıretseń, qaı baǵytta baptasań, ıt seniń senimdi serigińe aınalady. Keıde báribir ol ıt qoı dep jatady. Al, olardyń adamǵa degen adaldyǵy, senimdiliginde shek joq. Tek ony túsine bilý kerek. Taǵy bir aıtar mańyzdy jaıt, qyzmette ıtterdi durys qoldana alý kınologqa 70 paıyz qatysty. Qalǵan 30 paıyzy ǵana ıtke baılanysty. Sondyqtan kásibı maman bolý ýaqytpen, tynymsyz izdenýmen keledi», -deıdi E.Qýanyshev.

BQO polıtsııa departamentiniń málimeti boıynsha jyl basynan beri kınogogııalyq qyzmetpen 9 qylmys ashylǵan.

Oǵan qosa esirtki qylmysyna qarsy is-qımyl basqarmasynyń qyzmetkerlerimen birge 13 esirtki qylmysy áshkerelendi.