Itbalyqtardan alynǵan synamalar Astanaǵa jiberiledi

ASTANA. QazAqparat - Atmosferalyq aýanyń jáne sýdyń lastanýy ıtbalyqtardyń jappaı ólýiniń sebepshi emes. Bul týraly oblystyq ekologııa departamentiniń basshysy Abaı Safın málim etti, dep habarlaıdy Mańǵystaý oblysy ákiminiń baspasóz qyzmeti.

Ekologııa departamentiniń qyzmetkerleri Fort-Shevchenko mańaıyndaǵy jaǵalaý alqabynda qashyqtyǵy 500 metrdeı úsh jerden sý men aýanyń synamalaryn taldaý jasaýǵa aldy. Suryptaý nátıjesinde atmosferalyq aýanyń jáne sýdyń normadan artyq bolýy anyqtalmady.

Túpqaraǵan aýdany ákiminiń ókimimen quramynda tótenshe jaǵdaı bóliminiń, ekologııa departamentiniń, orman sharýashylyǵy men janýarlar dúnıesi aýmaqtyq ınspektsııasynyń, aýmaqtyq veterınarııa ınspektsııasynyń óqilderi bar arnaıy komıssııa quryldy.

Mańǵystaý oblysynda teńiz faýnasyn zertteıtin ortalyqtyń bolmaýyna baılanysty aýdandyq aýyl sharýashylyǵy men veterınarııa bólimimen alynǵan synamalar Astana qalasyndaǵy Ǵylymı-referenttik-zertteý ortalyǵyna joldandy.

Kaspıı teńiziniń Fort-Shevchenko qalasy aýmaǵynda jaǵalaýǵa shyǵyp qalǵan ıtbalyqtardyń ólekseleleri eskirip ketken, kópshiliginiń terileri búlingen, deneleri tesilgen, tolyqtaı nemese jartylaı zaqymdanǵan, shirigen. Búgin 26 sáýir kúni terisi zaqymdanbaǵan bir bas ıtbalyqty Túpqaraǵan aýdandyq veterınarııalyq stansanyń veterınarlary jaryp kórgen. Janýardyń ishki organdary tolyqtaı shirip ketkendigi anyqtaldy. Mundaı jaǵdaıdaǵy ólekselerden dıagnostıkalyq zerthanalarǵa joldaýǵa jaramdy synama alý múmkin emes.  Búgin Fort-Shevchenkoǵa QR Aýyl sharýashylyǵy mınıstrliginiń tapsyrysy boıynsha Kaspıı teńizinde zertteý jumystarymen aınalysatyn  Almatydaǵy «Mıkrobıologııa jáne vırýsologııa ǵylymı-zertteý ınstıtýty» qyzmetkerleriniń kelýi kútilýde. Anyqtaý jumystary ári qaraı osy ınstıtýttyń ǵylymı qyzmetkerlermen birlesip júrgiziletin bolady.

Kommýnaldyq mekeme qyzmetkerlerimen ıtbalyqtardyń ólekselerin jınap, arnaıy polıgonda joıýda.

«Meniń oıymsha, bul janýarlar teńizdegi zııandy zattardan ólgen joq. Munda sebep múldem basqa. Qazir kún jylynyp, Soltústik Kas-pııdegi muz erip jatyr. Itbalyqtardyń  ólikteri muzda qalyp, daýyl bolǵanda teńiz tolqynymen jaǵalaýǵa laqtyrylǵan. Biraq olardyń óliminiń naqty sebebi áli belgisiz. Tabylǵan ıtbalyqtarda torlardyń izderi bolýyna baılanysty olardy brakonerler ustap alyp, óltirýi de yqtımal», - dedi  «EKO Mańǵystaý» úkimettik emes uıymnyń dırektory Kırıll Osın.

Túpqaraǵan  aýdanynyń veterınarııa stantsııasy qyzmetkerleri jaǵalaýda tekserý jumystaryn jalǵastyrýda.