Itbalyqtardyń qyrylý sebebin naqtylaýǵa 3-4 aı ýaqyt kerek - mınıstr

<p>ASTANA. KAZINFORM &ndash; Itbalyqtardyń óleksesi tabylǵan oryndardaǵy alǵashqy synamalardyń nájesi belgili boldy. Bul týraly Ekologııa jáne tabıǵı resýrstar mınıstri Erlan Nysanbaev málim etti.</p>

«24 qazannan bastap ólgen ıtbalyqtar tirkele bastady. Shyn máninde jaýapty qyzmetterdiń barlyǵy sol jerge bardy, sondaı-aq veterınarlar men ekologtar, gıdrobılogııa men ekologııa ınstıtýttary, qoǵamdyq uıym ókilderi bar. Tıisti synamalardyń barlyǵy alyndy. Pasterellez, tyrysqaq, oba aýrýlary boıynsha alǵashqy synamalar zertteldi. Bul rette, osy indetter tabylmady», - dedi E. Nysanbaev Parlament Májilisinde tilshiler suraǵyna jaýap bere otyryp.

Onyń sózine qaraǵanda, qazir mamandar sý túbinde jer silkiný saldarynan tabıǵı gazdyń shyǵýynan nemese sýdyń lastanýynan ıtbalyqtar qyrylýy múmkin degen tujyrymdy aıtyp jatyr.

«Maǵan osy máselege qatysty málimet berip jatyr. Atap aıtqanda sýda normadan aýytqý baıqalmady. Ǵalymdardyń málimetinshe, qorytyndy nátıjeni jarııalaý úshin 3-4 aı ýaqyt kerek. Olardyń zertteý nátıjesin kútemiz. Ózimizdiń ekologııa departamentiniń zerthanalary aýanyń, sýdyń, topyraqtyń quramyn zerttedi. Bul jumystarǵa halyqaralyq uıymdardy qosqan joqpyz», - dedi mınıstr.

Eske salaıyq, 24 qazan men 18 qarasha aralyǵynda Kaspıı teńiziniń jaǵalaýynan 1 989 ıtbalyqtyń óleksesi tabyldy.

14 qarashada Aýyl sharýashylyǵy mınıstrligi Kaspıı teńizinde qyrylǵan ıtbalyqtardy zertteýge qatysty aldyn ala málimetti jarııalady.