Itbalyqtar men bekireniń qyrylý sebebi zerttelip jatyr – Nysanbaev

<p>Ekologııa jáne tabıǵı resýrstar mınıstri Erlan Nysanbaev elimizdiń batysynda ıtbalyq pen bekireniń qyrylýyna qatysty túsinik berdi, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Búginde ólgen 59 ıtbalyq pen 67 bekire balyǵy tabyldy. Daýyldan keıin olardy jaǵaǵa shyǵaryp tastaǵan. Ólekselerge qaraǵanda olar ártúrli ýaqytta ólgen. Sol sebepti búginde ol jaqta quramynda ǵylymı-zertteý ınstıtýttary, Itbalyqtardy zertteý jáne saýyqtyrý ortalyǵy, jergilik memlekettik organdar ókilderi bar jumys toby aınalysyp jatyr. Balyq sharýashylyǵy komıtetiniń ókilderi jaǵdaıdy zerdeleýde. Sýdan, aýadan, topyraqtan qajetti synamalar alyndy», – dedi mınıstr Ortalyq kommýnıkatsııalar qyzmetindegi baspasóz máslıhatynda.

Erlan Nysanbaevtyń atap ótýinshe, janýarlarlar men balyqtardyń qyrylýyna munaı qaldyqtarynyń tógilýi áser etpegen.

«Ótken jyly da ıtbalyqtardyń qyrylýy tirkelgen edi. Ol kezdegi sebebi – ótkir pnevmonııa. Sondyqtan da qazirgi ýaqytta túrli aýrýlar men ózge de sebepterdi qarastyryp otyrmyz», – dedi vedomstvo basshysy.

Eske salaıyq, keshe Kaspıı jaǵalaýynan qyrylǵan ıtbalyq pen bekire balyǵynyń ólekseleri tabylǵan bolatyn. Ekologııa jáne tabıǵı resýrstar mınıstrligine qarasty Balyq sharýashylyǵy komıteti saǵat shashamen 10.40 kezinde Túpqaraǵan aýdany Baýtıno aýylynyń mańynan 25 óli ıtbalyq ushasy men 33 bekire tuqymdas balyq anyqtalǵanyn málim etken edi.