Italııanyń burynǵy premer-mınıstri Sılvıo Berlýskonı dúnıeden ótti

RIM. QazAqparat – Italııanyń burynǵy premer-mınıstri Sılvıo Berlýskonı 87 jasynda dúnıeden ozdy. QazAqparat bul týraly Corriere della Sera basylymyna silteme jasap habarlaıdy.

Bıylǵy sáýir aıynda Berlýskonı ókpeniń qabynýymen Mılannyń «San-Raffaele» aýrýhanasyna túsip, odan mıelomonotsıtarly leıkoz (sonyń aıasynda ókpesi qabynǵan) anyqtalǵan edi. Ol kezde saıasatker dárigerler baqylaýynda bir aı jatyp, hımıoterapııa kýrsynan óte bastady.

9 maýsymda ol aýrýhanaǵa qaıta jatqyzylǵan bolatyn.

Sılvıo Berlýskonı – ıtalııalyq memlekettik jáne saıası qaıratker, bıznesmen, medıamagnat.

Ol Italııa Úkimetin tórt ret basqarǵan: 1994-1995, 2001-2005, 2005-2006, 2008-2011 jyldar aralyǵynda.

1986 - 2016 jyldary «Mılan» fýtbol klýbyna ıelik etti. Mediaset telejelisiniń negizin qalaýshy. Forbes tizimine engen dáýletti adamdardyń biri.