Italııan tilinen aýdarylǵan «Myń ǵajaıyp. Italııaǵa saıahat» kitaby oqyrmanǵa jol tartty
Atalǵan joba Italııa mádenıet ınstıtýtynyń bastamasymen jáne Italııanyń Astanadaǵy elshiliginiń qoldaýymen júzege asqan. Jańa kitap Rýslan Ádildiń aýdarmasymen Steppe&world baspasynan jaryq kórgen.
«Osyǵan deıin álemniń kóptegen tilderine aýdarylǵan bul kitapta Jeronımo atty tyshqannyń shtyrmanǵa toly oqıǵalary týraly baıandalady. Onda ıtalııanyń eń qyzyqty jerleri týraly aıtylady. «Myń ǵajaıyp. Italııaǵa saıahat» jaı ǵana kitap emes, ol sizdi birinshi betinen bastap baýyrap alyp, sońǵy núktesine deıin jibermeı ózimen birge qııal álemine saıahattatady», - deıdi Steppe&world baspasynyń bas redaktory, jazýshy Yrysbek Dábeıuly.
Qazaq tilinde jaryq kórgen jańa kitaptyń tusaýkeserine arnaıy kelip qatysqan Italııa mádenı ınstıtýtynyń basshysy Edýardo Krısafýlı Steppe&world baspasynyń ujymy men aýdarmashy Rýslan Ádildige alǵysyn aıtyp, shyǵarmanyń qundylyǵy men mańyzyna toqtaldy.
«Atalǵan týyndy osyǵan deıin Eýropa elderiniń kóptegen tilderine jáne arab, ýkraın tilderine aýdarylǵan. Endi osy joly qazaq tiline de sapaly, jaqsy aýdarylyp, oqyrmandaryn qýantatynyna senimdimin. Shyǵarma ıtalııan tilinde asa kórkem jazylǵan. Balalarǵa arnalǵan ádebıet árbir ult úshin óte mańyzdy qundylyq! Sondyqtan osy shytyrman oqıǵalarǵa toly týyndyny ata-analar balalarymen birge oqýyna bolady. Aldaǵy ýaqytta da bul «Italııandyq tyshqan» álemdi saıahattaýyn jalǵastyra bermek. Bizdiń Jeronımo órkenıetti elden shyqqan «mádenıeti» joǵary tyshqan dep túsinińizder», - degen Edýardo Krısafýlı myrza sóziniń sońyn jarasymdy ázilmen túıindedi.
Aıta keteıik, Steppe&World Publishing – álemdik bestsellerlerdi qazaq tiline aýdaratyn otandyq baspa. Bul kitaptardyń qatarynda Hárrı Potterdiń oqıǵalar serııasy, Narnııa shejiresi, sondaı-aq Harýkı Mýrakamı men Elıf Shafaktyń kitaptary bar.