Italııalyq kásipkerler Mańǵystaýdaǵy týrızm salasyna qyzyǵýshylyq tanytty

AQTAÝ. QazAqparat - Italııalyq kásipkerler Aqtaý qalasynda bıznesin damytýǵa nıetti. Olar 3 jyldan beri Mańǵystaý óńirin zerttep, nátıjesinde ındýstrııalyq áleýeti joǵary Venetsııa provıntsııasyndaǵy Lonıgo qalasy men Aqtaý arasynda eki jaqty týrızmdi damytýǵa ınvestıtsııa quıýǵa ázir ekenin jetkizdi, dep habarlaıdy Qazaqparat tilshisi.

Italııanyń bıznes ókilderin mádenıet, sport pen aýylsharýashylyq, ken óndirý baǵytyndaǵy jobalar da qyzyqtyrady. Osy maqsatpen Aqtaýǵa at basyn tiregen sheteldik delegatsııa jergilikti isker azamattarmen kezdesti. «Atameken» kásipkerler palatasynda eki qalanyń bıznes ókilderi eki elge de tıimdi jobalardy talqylady.

«Kez-kelgen ınvestıtsııalyq jobany júzege asyrý úshin aldyn-ala úlken daıyndyq qajet. Biz munda kelmes buryn, 3 jyl boıy belgili bir baǵyttar boıynsha ázirlik jumystaryn júrgizdik. Sonyń ishinde týrızm salasyna kóńil bólip otyrmyz. Biz Aqtaý qalasyn damytýdyń tetikterin kórip turmyz. Osy turǵyda ákimdikpen, týrıstik kompanııalarmen qonaqúıler jelisimen kelissózder júrgizemiz», - deıdi Lonıgo qalasynyń meri Lýka Restello.

Jalpy, Mańǵystaý oblysynyń Italııamen saýda aınalymy 482,2 mln AQSh dollaryn qurady, ıaǵnı eksport - 447,1 mln AQSh dollary, ımport - 35,2 mln AQSh dollary.

Mańǵystaý oblysy kásipkerler palatasynyń dırektory Nurbek Qarasaevtyń aıtýynsha, oblysta syrtqy saýdaǵa shyǵatyn polıetılen qubyrlary, tsement jáne ammonıı nıtratynyń eksporty úlken áleýetke ıe.

«Mańǵystaý oblysynyń syrtqy saýda aınalymy 3,5 mlrd AQSh dollaryn qurap otyr. Sonyń ishinde eksport - 3,1 mlrd $, ımport -338,1 mln $.

Qazaqstanda saýda áriptestigin nyǵaıtqan alǵashqy úshtikte Italııa tur. Elbasy elimizge keletin ımportty otandyq ónimmen almastyrý boıynsha jumysty kúsheıtý jáne taýardy eksporttaýshylarǵa qoldaý kórsetý qajettiligin únemi atap ótedi. Sondyqtan ınvestorlarǵa qolaıly jaǵdaı jasaýǵa bar múmkindik týǵyzamyz», - deıdi ol.

Óńirde Italııanyń kásipkerlerimen áýelden yntymaqtastyq ornatqan bıznes ókilderi bar. Solardyń biri Sáýle Salıhova. Ol «ásirese, jıhaz salasynda áriptestik ornatýǵa nazar aýdarý kerek» dep esepteıdi.

«2007 jyldan beri ınterer, jıhaz jasaýshy 70-ten astam ıtalııalyq kásipkermen jumys istep kelemin. Mılanda ótetin barlyq kórmelerge qatysamyn. Ondaǵy zaýyttardyń ınnovatsııalyq quraldarmen jabdyqtalǵanyna kózim jetti. Sondyqtan da iskerlik áriptestikti odan ári damytýǵa daıynmyn», - deıdi ol.

Bıznesti birlese damytýdy usynǵan kásipkerler keler jyly sáýirde Italııada ótetin ekonomıkalyq forýmǵa shaqytý aldy. Mańǵystaýda teorııalyq turǵyda aıtylyp, qaǵaz júzinde jasalǵan kelisimder sol kezde naqty júzege asady. Investorlar iskerlerge «teń dárejede múmkindik jasalady», dep sendirip otyr.