Italııaǵa baratyn almatylyq ónerpazdar «Dombyra party» sharasynda baq synady

ALMATY. QazAqparat - Almatynyń ár aýdanynda Naýryz merekesi toılanyp jatyr. Aýqymdy merekelik sharalar Alataý aýdanynda da uıymdastyryldy, dep habarlaıdy QazAqparat.

Aýdan turǵyndary búgin «Almaty Arena», Alataý kınokontsert zalynyń mańyna jınaldy.

Bul jerde Naýryz meıramyn toılaý kezinde kóshpeli jastar saýyq quratyn altybaqandardyń tutas bir parki ornatyldy. 10 shaqty kıiz úı tigildi. Naýryz kóje men ulttyq dastarhan jaıylyp, qonaqtarǵa taratyldy.

Shyǵarmashylyq tulǵalar óz ónerin ortaǵa salý úshin «Almaty Arena» muz saraıyndaǵy óner alańynda bas qosty.

Jınalǵan halyq aldynda «Álqıssa» dombyra stýdııasynyń shákirtteri óner kórsetti.

16 oqýshy halyq kúılerin, Nurǵısa Tilendıevtiń «Álqıssa», «Ata tolǵaýy», Jasaral Eńsepovtyń «Áke tolǵaýy», Abdýlhamıt Raıymbergenovtiń «Sekirtpesin», Ábdimomyn Jeldibaevtyń «Erke sylqymyn», Qurmanǵazynyń «Balbyraýynyn» oryndady.

«Ulystyń uly kúni Alataý aýdanynda dýman bolyp jatyr. «Álqıssa» dombyra stýdııasy «Shańyraq» shaǵyn aýdanynda ashylǵanbyz. Ómiri qolyna dombyra ustamaǵan balalar úırenip jatyr. 1,5 jyl ýaqyt aralyǵynda repýblıkalyq konkýrstarda laýreat atanyp jatyr. Byltyr Túrkııanyń Kemer qalasyndaǵy ótken halyqaralyq konýrsta bas júldeni utyp aldyq. Keshe Almatyda ıtalıandyqtar ótkizgen konkýrsqa qatysyp, bas júldeni jeńip aldyq. Jazda Italııaǵa baramyz», - dedi «Álqıssa» dombyra stýdııasynyń dırektory Qanatbek Sáden.