Italııadaǵy Qazaqstan elshiliginde jedel shtab quryldy

NUR-SULTAN. QazAqparat - Italııada 1800 qazaqstandyq azamat bar. Bul týraly brıfıngte QR SІM resmı ókili Aıbek Smadııarov aıtty, dep habarlaıdy QazAqparat.

«Bizdiń málimet boıynsha, Italııada 1800 qazaqstandyq azamat bar. Onyń 673-i konsýldyq esepte tur. Italııadan Qazaqstanǵa tikeleı reıs joq, kóbine úshinshi memleket arqyly júredi. Bizdiń elshilikte jedel shtab quryldy, olar áleýmettik jeli arqyly jaǵdaıdy baıandap, baqylaýda ustap otyr. Aýrý juqtyrǵan jáne aýrý juqtyrýy múmkin azamattar arasynda qazaqstandyqtar joq», - deıdi Aıbek Smadııarov.

Sondaı-aq, ol qazaqstandyq azamattardy Eýropadan qaıtarýdyń qıyndyqtary týraly aıtty.

«Eýropa reısteriniń qıyndyǵy az emes. Kez kelgen azamat Eýroodaqqa múshe elderdiń kez kelgenine shekarany kesip ótip, arnaıy mórsiz bara alady. Bul týraly eshkim bilmeı de qalady. Biz eýropalyq seriktestermen kelissóz júrgizip jatyrmyz. Eýropalyq bılik sheshim qabyldaýda. Jaqyn arada jaýabyn aıtady», - deıdi ol.