Italııada sý tasqynynan 13 adam qaza taýyp, myńdaǵan turǵyn evakýatsııalandy

ASTANA. QazAqparat - Italııada bir jarym kúnde alty aılyq normada jaýǵan jańbyrdan oryn alǵan sý tasqyny saldarynan kem degende 13 adam qaza taýyp, 13 myńnan astam turǵyn úılerin tastap ketýge májbúr boldy, dep habarlaıdy QazAqparat VVS agenttigine silteme jasap.

Tolassyz jaýǵan jańbyr saldarynan bir-birinen 115 shaqyrym qashyqtyqta ornalasqan Rımınıdiń soltústik-shyǵys jaǵalaýy men Bolonıa qalasynyń arasyndaǵy ózenderdiń barlyǵy derlik arnasynan tasydy.

Qala oramdary men aýyl sharýashylyǵyna paıdalanatyn jerlerdi, 400 joldy sý basty.

Túnde 280-ge jýyq kóshkin júrip, turǵyndardy evakýatsııalaý týraly sheshim qabyldandy.

Órt sóndirýshiler turǵyndarǵa úılerinen shyǵýǵa kómektesti. Olar 97 jastaǵy bir keıýanany jatyn bólmesinen rezeńke qaıyqpen alyp shyqqan.

Ózen jaǵasynda turatyn 55 jastaǵy zańger Antonıo Franchesko Rıtstsýto seısenbi kúni keshke úıin tastap ketýge májbúr boldy.

Qazir ol qyzymen birge jaqyn mańdaǵy kentte turady.

«Mundaı masshtabty eshkim kútpegen edi. Biz úıde bolǵan kezde sý deńgeıi mınýt saıyn kóterilip turdy. Al keshe qaıtyp kelsek, qonaq bólmemizdi tolyǵymen sý basyp qaldy. Jıhazdyń kóp bóligin laqtyryp tastaýǵa týra keledi», - dedi ol.

Buǵan deıin Italııada nóser jaýynnyń sý tasqynyna ulasqanyn habarlaǵan bolatynbyz.