Italııada nóser jaýynnyń sońy sý tasqynyna ulasty

ASTANA. QazAqparat – Italııanyń basym bóliginde jaýǵan nóser jańbyr Chezena qalasy arqyly aǵyp ótetin Savıo ózeniniń arnasynan shyǵýyna ákep soqty. Eldimekender men dalany Savıo men Italııanyń soltústigindegi basqa da ózenderdiń sýy basyp qalyp, kóshkin júrdi. Kóp adam úıdiń shatyryna shyǵyp, kómek kútip otyr, dep habarlaıdy QazAqparat Euronews agenttigine silteme jasap.

Venetsııa bıligi sý tasqynyn toqtatý úshin lagýnadaǵy mobıldi bógetti iske qosýǵa daıyndalyp jatyr. Ózen janynda turatyn adamdarǵa sýdy qyzyqtaımyn dep tómengi qabattarda qalyp qoımaýdy eskertti.

«Aqylǵa kelińizder, apat tragedııaǵa aınalyp ketpes úshin sý kóremin dep jeke qaýipsizdigińizdi umytyp ketpeńiz», - dedi Chezena meri Entso Lattýka teledıdar arqyly sóılegen sózinde.

Italııanyń soltústik-shyǵysyndaǵy Ravenna týrıstik qalasynyń bıligi de halyqty ǵımarattyń joǵarǵy qabatyna shyǵýǵa shaqyrdy.

Adrıat teńizi jaǵasyndaǵy Rıchchon qalasynyń meri de sýdan júzip ótý úshin qaıyq jáne basqa quraldardy paıdalanbaýǵa shaqyrdy.

Eldegi nóser jaýyn men jel jaqyn kúnderi toqtamaıdy.

Emılıı-Romanede joǵary qaýip dárejesi (qyzyl) engizildi. Jaýyn saldarynan poıyzdardyń qozǵalysy toqtap, mektepter jabyldy.