Italııada karnavaldar maýsymy ashyldy
Karnavaldar baǵdarlamasynda – qaıyqtar sherýi, sándi saraılardaǵy baldar, Arsenal verfteri jáne San-Marko alańyndaǵy mýzykalyq qoıylymdar bar. Uıymdastyrýshylar venetsııalyqtar men týrısterdi kostıým tańdaýǵa shyǵarmashylyqpen qaraýǵa shaqyrdy. Bıylǵy taqyryp – astrologııanyń jeke tulǵaǵa áseri jáne juldyznama belgilerin «ekstravagantty» kórsetý.
Qaladaǵy is-sharalardyń kópshiligi tegin, palatstsodaǵy keshter bıletpen ótedi.
Venetsııada jáne basqa da lagýna qalalarynda merekeler 21 aqpanǵa deıin jalǵasady.
Apennındegi taǵy bir iri karnaval Toskana aımaǵyndaǵy – Vıaredjoda bastaldy. Jergilikti deńgeıdegi bul karnaval venetsııalyq karnavalǵa qaraǵanda jasyraq – bıyl oǵan 150 jyl bolady. Munda halyqtyq merekelerdi saıası satırasyz jáne ózekti máselelerdi mazaq etpesten elestetý múmkin emes. Lıgýrııa teńiziniń jaǵalaýyndaǵy karnavaldyń basty belgileriniń biri – ataqty adamdardyń pape-masheden jasalǵan alyp fıgýralarynyń sherýi.
Foto: AP Photo/Antonio Calanni