Italııada 500 myń jumysshy sherýge shyqty

<p>ASTANA. KAZINFORM &ndash; Eń iri kásipodaqtar jarııalaǵan jalpy ereýil aıasynda 500 myńǵa jýyq jumysshy Italııa qalalarynyń alańdaryna sherýge shyqty. 8 saǵattyq ereýil barlyq negizgi memlekettik sektorlardy qamtydy, onyń ishinde densaýlyq saqtaý, bilim berý, sondaı-aq memlekettik organdar men kompanııalar bar. Kólik, áýe jáne teńiz qatynasy quzyrly organdardyń buıryǵyna sáıkes tórt saǵatqa úzildi, dep habarlady <a href="https://tass.ru/ekonomika/22536809" target="_blank" rel="noopener">TASS.</a></p>

ANSA agenttiginiń habarlaýynsha, eń iri demonstratsııa Bolonıada Jalpy Italııa eńbek konfederatsııasynyń (Cgil) basshysy Maýrıtsıo Landınıdiń qatysýymen ótti. Kásipodaqtardyń málimetinshe, narazylyq aktsııasyn ártúrli saladaǵy jumysshylardyń 70 paıyzdan astamy qoldaǵan. Keıbir kompanııalar kúni boıy jumys istemedi. El boıynsha myńdaǵan adam qatysqan 43 sherý boldy; tek Týrınde polıtsııamen qaqtyǵystar bolǵan.

Búkilhalyqtyq ereýil, kásipodaqtardyń pikirinshe, jumysshylardyń múddesi eskerilmeıtin bıýdjet jobasynyń bekitilýine narazylyq retinde jarııalandy. Atap aıtqanda, densaýlyq saqtaý men bilim berý, sondaı-aq áleýmettik salaǵa jumsalatyn qarjynyń qysqartylyp jatqany alǵa tartylýda.

Italııada saǵatyna 9 eýro bolatyn eń tómengi jalaqy shegin ornatý úshin uzaq ýaqyt boıy kúres júrip jatyr.

Eldegi áleýmettik jaǵdaı týraly sońǵy esepterge sáıkes, Italııada 5,7 mıllıon adam absolıýtti kedeılikte ómir súredi, ıaǵnı derlik árbir onynshy azamat degen sóz. Balaly jas otbasylar eń osal top bolyp qala beredi. Bir qyzyǵy, eldiń ekonomıkalyq qozǵaltqyshy sanalatyn Italııanyń soltústik aımaqtarynda sońǵy toǵyz jylda absolıýtti kedeılikte ómir súretin ıtalıandyqtardyń sany eki esege ósken.

Qosa keteıik, qazan aıynyń ekinshi jartysynda 20 jyl ishinde Italııanyń alǵashqy jalpyulttyq ereýiline qatysý úshin Rım kóshelerine ondaǵan myń avtojumysshy sherýge shyqqan bolatyn.