Italııa premer-mınıstri Djýzeppe Konte otstavkaǵa ketpek

RIM. QazAqparat – Italııa úkimetiniń basshysy Djýzeppe Konte qyzmetinen ketýge nıetti ekenin málimdedi, dep habarlaıdy QazAqparat ANSA agenttigine silteme jasap.

Baqylaýshylardyń aıtýynsha, bul kútpegen sheshim emes.

Óıtkeni «5 juldyzdyń qozǵalysy» jáne Demokratııalyq partııa quramyndaǵy bıleýshi koalıtsııa Parlamenttiń joǵarǵy palatasynan (Senatynda) eks-premer Matteo Rentsıdiń «Tiri Italııa» partııasy shyqqannan keıin absolıýtti kópshilikti joǵaltty.

Otstavkaǵa ketý resmı bolýy múmkin dep kútilip otyr, óıtkeni Konteniń jańa mandat alýy ǵajap emes.

Sonyń arqasynda ol Parlamentte keń qoldaýǵa ıe bolatyn kabınet qurýǵa múmkindik alady. «Qozǵalys» ta, Dempartııa da Kontege qoldaý bildirdi, dep habarlaıdy TASS.

Ótken aptada onyń kabıneti Parlamenttiń eki palatasynda da senimge ıe boldy, biraq Senatta «Tiri Italııa» senatorlary qalys qalsa da, oǵan qarapaıym kópshilik daýys berdi.

Odan ári daýys berýde Úkimet kópshiliktiń qoldaýyn joǵaltýy múmkin. «Lıga», «Alǵa, Italııa» jáne «Italııa aǵalary» partııalarynyń quramyndaǵy pravotsentrıstik oppozıtsııa merziminen buryn saılaýdy talap etedi.

Qosymsha daýys berý jáne basqarýshy koalıtsııany jańartý týraly másele áli de ashyq qalyp otyr, bul merziminen buryn daýys berý stsenarııin joqqa shyǵarmaıdy.