Italııa Elshisi Qazaqstandaǵy óz mıssııasyn aıaqtady

NUR-SULTAN. QazAqparat - Qazaqstan Respýblıkasy Syrtqy ister mınıstriniń orynbasary Erlan Álimbaev elimizdegi dıplomatııalyq mıssııasynyń aıaqtalýyna oraı Italııa Elshisi Paskýale D’Avınony qabyldady. Bul týraly QazAqparat SІM silteme jasap habarlaıdy.

Qazaqstandyq dıplomat Elshiniń Qazaqstanda qyzmet atqarǵan jyldary ishinde ekijaqty ekonomıkalyq baılanystardy nyǵaıtýǵa qosqan nátıjeli jumysyn atap ótti.

Taraptar syrtqy saıası vedomstvolary basshylary arasyndaǵy turaqty baılanystarynyń oń dınamıkasyn atap ótip, joǵarǵy jáne asa joǵary deńgeıdegi ózara saparlardy uıymdastyrý jónindegi josparlardy talqylady. Ekijaqty saýdanyń edáýir kólemi men Qazaqstanǵa quıylǵan ıtalıandyq ınvestıtsııalardy nazarǵa ala otyryp, ekijaqty saýda-ekonomıkalyq jáne ınvestıtsııalyq yntymaqtastyqty odan ári tereńdetý qajettigine asa nazar aýdaryldy. Osy mánmátinde suhbattastar ekijaqty ekonomıkalyq ózara is-qımyl damýynyń nátıjeli quralyna aınalǵan Ónerkásiptik jáne ekonomıkalyq yntymaqtastyq boıynsha qazaqstandyq-ıtalıandyq úkimetaralyq jumys tobynyń róli atalyp ótildi. Suhbattastardyń paıymdaýynsha, 2022 jyly Almatyda ashylýy josparlanǵan Italııa mádenıeti ınstıtýti eki memlekettiń halyqtary arasynda mádenı-gýmanıtarlyq baılanystardyń damýyna serpin beredi. Kezdesý qorytyndysy boıynsha E.Álimbaev ıtalıandyq dıplomatqa bolashaq atqarar qyzmetine sáttilik tilep, ol árqashanda Qazaqstannyń asyǵa kútetin qonaǵy bolyp qala beretindigin jetkizdi.