Italııa Albanııada zańsyz mıgranttardy qabyldaý ortalyqtaryn salady

<p>Italııa Albanııada myńdaǵan zańsyz mıgranttardy ornalastyrý úshin eki ortalyq salady. Bul týraly Italııa premer-mınıstri Djordja Melonı Rımde Albanııa premer-mınıstri Edı Ramamen ótken baspasóz máslıhatynda málimdedi, dep habarlaıdy Kazinform <a href="https://www.bbc.com/news/world-europe-67339596" target="_blank" rel="noopener">BBC </a>jańalyqtaryna silteme jasap.</p>

Melonıdiń aıtýynsha, kelesi kóktemde ashylatyn ortalyqtar jylyna 36 myń adamǵa deıin qabyldaı alady.

Bul ıtalııalyq kemeler Jerorta teńizinen qutqaryp alǵan mıgranttarǵa qatysty.

Olar baspanaǵa ótinishteri qaralǵansha osy ortalyqtarda bolady. Sonymen qatar Melonı jospar júkti áıelderge, kámeletke tolmaǵan balalarǵa jáne osal toptaǵy adamdarǵa qoldanylmaıtynyn aıtty.

Qurylysyn Italııa qarjylandyratyn ortalyqtar aı saıyn 3000 adamǵa deıin qabyldaıdy. Mıgranttar ol jerde baspana týraly ótinishteri óńdelgenshe jáne qajet bolǵan jaǵdaıda repatrıatsııa jasalǵansha tura alady.

Ortalyqtar Shendjın portynda jáne Albanııanyń soltústik-batysyndaǵy Gıader aýdanynda salynady. Mıgranttardyń qaýipsizdigin Albanııa qamtamasyz etedi.

Melonı Albanııanyń EO-ǵa kirýin qoldaıtynyn jáne «Albanııa negizinen eýropalyq el» ekenin aıtty.

Buǵan jaýap retinde Albanııa premer-mınıstri Edı Rama Italııamen qarym-qatynasqa jyly lebizin bildirip, 1990 jyldary kommýnıstik rejım qulaǵannan keıin ıtalııa turǵyndary men uıymdary albandyqtarǵa kómekteskenin aıtty.

Ońshyl «Aǵaıyndy Italııa» partııasyn basqaratyn Djordja Melonı mıgratsııaǵa qarsy kózqarasymen tanymal. Premer-mınıstr bolǵannan beri ol zańsyz mıgratsııany toqtatý sharalaryn jarııalady.

Bıyl Italııaǵa 145 myńnan astam mıgrant keldi, bul 2021 jyldyń sáıkes kezeńimen salystyrǵanda 52 myńǵa kóp.