It talap, bir aıaǵynan aıyrylǵan Atbasar turǵynyna ıttiń ıeleri 5 mln teńge tóleıdi

ATBASAR. QazAqparat – Atbasar aýdandyq sotynyń sheshimimen ıt talap aıaǵynan aıyrylǵan áıelge ıt ıeleri 5 mln teńge moraldyq shyǵyndy óteıtin boldy, dep habarlaıdy QazAqparat tilshisi.

Aqmola oblystyq soty baspasóz qyzmetiniń málimetinshe, Atbasar qalasynda jumysqa bara jatqan jergilikti turǵynǵa alabaı tuqymdy ıt shabýyl jasaǵan.

Saldarynan áıeldiń densaýlyǵyna aýyr zııan kelgeni anyqtaldy.

Atbasar aýdandyq polıtsııa bóliminiń qyzmetkerleri ıttiń ıesine qatysty ákimshilik quqyq buzýshylyq týraly hattama toltyryp, aıyppul saldy.

«Zardap shekken áıel statsıonarlyq em qabyldady, ony odan ári emdeý jáne aıaǵyn protezdeý qajet. Emdeý barysynda áıel múgedekter arbasyn, dári-dármek jáne ózge qajetti zattardy satyp alý úshin kóp qarjy jumsady, sonymen birge, ol jalpy eńbekke qabiletin joǵaltty, sol jaq aıaǵyn tizesine deıin ampýtatsııalady», - dedi vedomstvodan.

Anyqtalǵandaı ıt ıeleri Ch. men G-niń ıtke qujattary joq. Alty jastaǵy azııalyq tuqymdy ıt Ch-ǵa tıesili. Alaıda, azamattar Ch. men G-nyń jaýapkershiligi ortaq, óıtkeni ıt olardyń birlesip ómir súrý kezeńinde satyp alynǵan, olar oǵan birlesip kútim jasaǵan.

«Atbasar aýdandyq sotynyń sheshimimen zardap shekken áıeldiń densaýlyǵyna kelgen zalaldy óteý jáne moraldyq zııandy óndirý týraly ıt ıelerine qatysty talap-aryzy ishinara qanaǵattandyryldy. Sot zardap shekken áıeldiń paıdasyna 357 914 teńge somasyndaǵy materıaldyq zalaldy, 85 131 teńge mólsherinde aıyrylǵan jalaqyny, 5 000 000 teńge mólsherindegi moraldyq zııandy óteýdi jáne ókildiń kómegine aqy tóleý jónindegi shyǵyndy ıt ıeleri Ch. men G-dan birlesip óndirip aldy», - dep tolyqtyrdy vedomstvodan.

Sot sheshimi zańdy kúshine engen joq.

Aıta keteıik, budan buryn Aqmola oblysynda 8 jastaǵy qyzdy ıt talaǵan edi.