ІT-menedjerler qaýymdastyǵy: Klıentterdiń 85 paıyzy «Qazaqtelekom» servısterin tanystaryna usynbaıdy

ASTANA. QazAqparat – Qazaqstan ІT-menedjerler qaýymdastyǵynyń basqarma tóraǵasy Asqar Bıshıgaev «Qazaqtelekom» kompanııasynyń 2022 jylǵy jumysy talqylanǵan qoǵamdyq keńes otyrysynda «Klıentterdiń qanaǵattaný ındeksi» deıtin kórsetkish engizýdi usyndy, dep habarlaıdy QazAqparat tilshisi.

«V2V» segmentinde de, «B2C» segmentinde de tutynýshylardyń «Qazaqtelekom» servısterine qanaǵattaný deńgeıi kóptegen suraq týyndatady. NPS (tutynýshylardyń adaldyq ındeksi – red) 7 paıyzdan 15 paızyǵa deıin kóterilgenin alǵa ilgerileý dep aıtýǵa bolatyn shyǵar. Biraq bul kórsetkish 30 paıyzǵa jetkende ǵana jaqsy deńgeı bolyp salynatynyn bárimiz túsinip otyrmyz. Odan tómengi kórsetkishtiń bári asa jaqsy emes», - dedi qaýymdastyq basshysy.

Sondaı-aq, ol «Qazaqtelekom» klıentteri qyzmet sapasyna kóńili tolǵandyqtan emes, basqa balama jol bolmaǵandyqtan ulttyq kompanııa usynatyn qyzmetterden bas tarta almaı otyrǵanyn aıtty.

«Bul (tutynýshylardyń adaldyq ındeksi 15 paıyzǵa jetkeni – red.) mynandaı ahýaldan habar beredi. «Qazaqtelekom» servısin qoldanatyn 100 adamnyń ishinde 85-i ózi tutynyp júrgen servısti óziniń týystaryna, jaqyn dostaryna usynbaıdy degen sóz. Sonda 15 adam ǵana usynady degen sóz. Shyn máninde «Qazaqtelekom» monopolııalyq uıym ekeni túsinikti. Sondyqtan qandaı da bir balama joq. Eger balama jol qandaı da bir básekelestik jaǵdaıynda paıda bolsa, «Qazaqtelekomnyń servıs sapasyna kóńili tolmaıtyn klıentter basqa uıymdarǵa aýysa bastar edi dep oılaımyn. Sondyqtan, meniń kózqarasym boıynsha, klıentterdiń qanaǵattaný ındıkatory degen halyqaralyq kórsetkishti engizýge bolady. Sol kórsetkishti durys eseptep úırensek, klıentterdiń, sizderdiń abonentterińizdiń kóńilin tabýǵa eleýli qadam jasaǵan bolar edik», - dedi Asqar Bıshıgaev.