ІT-qoǵamdastyq memleket úshin mamandar daıarlaý isine jumyldyrylady

ASTANA. QazAqparat - Qazaqstanda ІT-qoǵamdastyq memleket úshin mamandardy daıarlaýǵa jumyldyrylady. Bul týraly Májilistegi «Nur Otan» partııasy fraktsııasynyń jınalysynda partııa hatshysy Tamara Dúısenova málim etti, dep habarlaıdy QazAqparat.

«Biz biraz ýaqyttan beri ІT-mamandardy daıarlap kelemiz, sonymen qatar ІT-tehnologııalar da kún saıyn ózgerip otyratyny belgili. Sondyqtan da túlekter bilim berý uıymdaryn támamdap shyqqansha, ІT-qoǵamdastyq tarapy ózderiniń bilimderi eskirip jatqanyn aıtýda. Osyǵan baılanysty ІT-qoǵamdastyq bir jarym jylda bazalyq bilimi bar jastardyń biliktiligin shyńdaýǵa daıyn. Bul jas mamandar búgindegi kásiporyndarda, uıymdarda jáne jalpy ekonomıkada týyndaǵan qajettiliktiń ornyn toltyrar edi», - dedi Tamara Dúısenova.

Onyń sózine qaraǵanda, bilim berýdi qarjylyndyrý kózi retinde nátıjeli jumyspen qamtýdy jáne jappaı kásipkerlikti damytý baǵdarlamasy tańdaldy.

«Osy jobanyń eń basty talaby - ІT-ortalyq túlekteri jumysqa turýda bir jyl boıy «Atameken» UKP tarapynan qoldaýǵa ıe bolady. Ulttyq kásipkerler palatasy jastardy sońǵy býyndy tsıfrlyq tehnologııalarǵa oqytýdy usynýda. Barlyq ІT-ortalyqtar elordanyń jańa tehnologııalyq alańy Astana HUB-pen ıntegratsııalanady. Bul turǵyda osy tehnologııalyq alańdarda jumys isteıtin bolashaq mamandardy daıarlamaqpyz. Moıyndaý kerek, búginde bul alańdarǵa Ýkraına, Belarýs jáne Eýropa elderiniń mamandary tartylyp keledi», - dedi Tamara Dúısenova.