IT-Aiel baǵdarlamasy aıasynda eki myń qazaqstandyq áıel IT-mamandyqtarǵa tegin oqytylady

ASTANA. QazAqparat - Astana Hub Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııamen birlesip IT salasynda jumys istegisi keletin 2000 áıeldi oqytady, dep habarlaıdy QazAqparat tehnoparktiń saıtyna silteme jasap.

18 jastan asqan jumysqa ornalaspaǵan áıelder IT-Aiel baǵdarlamasyna qatysýǵa ótinish berip, No Code School, Freelance School, sondaı-aq negizgi kompıýterlik saýattylyq kýrstary boıynsha oqı alady. Qatysýshylar jańa isti ıgerýge 1 tamyzda onlaın formatta qazaq jáne orys tilderinde kirise alady. Baǵdarlama qyzyqty vebınarlar, vorkshoptar, tikeleı efırler, Q&A-sessııalary jáne t. b. turady.

QR Eńbek jáne halyqty áleýmettik qorǵaý mınıstrliginiń derekteri boıynsha elimizde 967 myń jumysqa qabiletti áıel bar, olardyń 34%-y jumys istemeıdi al 41%-y joǵary bilimdi.

Jaqynda Coursera IFC jáne Eýropalyq komıssııamen seriktestikte júrgizgen zertteý kórsetkendeı, áıelderdiń 45%-y jáne bala kútimindegi áıelderdiń 60%-y onlaın oqytý múmkindigi bolmaǵan jaǵdaıda, oqýdy keıinge qaldyryp nemese toqtatýǵa májbúr bolatynyn moıyndady. Sondyqtan IT-Aiel baǵdarlamasy jumyssyz áıelder úshin edáýir mańyzdylyq pen múmkindikke ıe.

Jobaǵa qatysý úshin áıelder qaýymy saıt arqyly ótinish berýi kerek: https://education.astanahub.com/itaiel. Oqytý qorytyndysy boıynsha jobanyń barlyq túlekteri oqýdy aıaqtaǵanyn rastaıtyn elektrondyq sertıfıkatqa ıe bolady. Baǵdarlamanyń úzdik 100 qatysýshysy kýrstyń sońynda saltanatty túrde marapattaýǵa shaqyrtý alady.

Ótinimderdi qabyldaý 15 shildege deıin jalǵasady, al qosymsha aqparatty osy silteme arqyly tabýǵa bolady: https://education.astanahub.com/itaiel/rus. Qosalqy suraqtar boıynsha [e-mail] elektrondyq poshtasyna jazyp nemese biryńǵaı nómir 2222 qońyraý shalý kerek.

Astana Hub – qazaqstandyq jáne sheteldik tehnologııalyq kompanııalardyń erkin damýy úshin búkil jaǵdaı jasalǵan Ortalyq Azııadaǵy eń iri tehnoparktiń biri. Qazirgi ýaqytta tehnoparkte myńnan astam qatysýshy bar. Olar 14 myńnan astam jumys ornyn ashty.

Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa áıelder men otbasylardyń ómir súrý jaǵdaılaryn jaqsartý strategııalaryn josparlap, iske asyrady. Áıelder quqyǵyn qorǵaý, otbasylardy qoldaý jáne demografııany nyǵaıtý baǵdarlamalaryn ázirleıdi jáne júrgizedi.