Ystanbulda úsh qabatty úı qulap qaldy
15:14, 02 Maýsym 2024
<p>ASTANA. KAZINFORM – Ystanbuldyń Kúchúkchekmedje aýdanynda úsh qabatty úı qulady. Oqıǵa ornyna qutqarýshylar jiberildi. Bul týraly <a href="https://tass.ru/proisshestviya/20970963" target="_blank" rel="noopener">TASS</a> aqparat agenttigi jazdy. </p>
TRT Haber telearnasynyń málimeti boıynsha, atalmysh jaǵdaıdan 7 adam zardap shekken. Eki adam úıindi astynan shyǵaryldy.
– Oqıǵa saǵat 08:40-ta boldy. Úıdiń birinshi qabatynda jumystar júrgizilip jatqan. Al, joǵarǵy jaǵynda adamdar turdy. Qazirgi ýaqytqa deıin 7 adam qutqaryldy, - dedi qala gýbernatory Davýt gúl TRT Haber telearnasyna bergen suhbatynda.
Gýbernatordyń aıtýynsha, zardap shekken eki adamnyń jaǵdaıy aýyr.
– Úıindilerdiń astynda taǵy eki adam bolýy múmkin, - dedi qala basshysy.
Óz kezeginde prokýratýra bul oqıǵa boıynsha tergeý júrgizip jatqanyn aıtty.
1988 jyly salynǵan ǵımarattyń qırandylary úıdiń janynda ornalasqan avtoturaqqa qulaǵan. Saldarynan mýnıtsıpaldy avtobýs pen birneshe kólik búlindi.