Ystanbul shirkeýinde bir adamdy atyp óltirip ketti
TRT Haber habarlaýynsha, atys jergilikti ýaqytpen saǵat 11:40 shamasynda Ystanbuldyń Saryer aýdanyndaǵy Áýlıe Marııa shirkeýinde bolǵan.
Qylmystyń sebebi áli belgisiz, biraq túrik sheneýnikteri shabýyl qaza bolǵan adamǵa baǵyttalǵan dep boljap otyr.
Syrtqy baqylaý kamerasy kadrlarynan kórinip turǵandaı, shirkeýge betperde kıgen eki qarýly adam kirgen sátte ishtegi adamdar esikke arqasyn berip, qurbandyq ústeline qarap turǵan.
Kúdiktiler shirkeýge jańa kirgen qara kıimdi adamnyń sońynan erip kelgen sııaqty.
Sol adamǵa oq jaýdyryp, jábirlenýshini óltirgennen keıin ekeýi tez arada izin jasyrǵan. Olar áli tabylǵan joq.
Qaza tapqan adamnyń kim ekeni áli belgisiz. Oqıǵa ornynda bolǵan Túrkııanyń ishki ister mınıstri Álı Erlikaıa marqumnyń esiminiń bas árpin ǵana atady: S. T.
VVS óltirilgen kisiniń aǵasy jergilikti BAQ-qa suhbat bergenin jazady. Ol marqumnyń 52 jasta ekenin jáne jaqyn arada hrıstıan dinine ótýdi oılap júrgenin, biraq áli shoqyndyrý rásiminen ótpegenin aıtqan.
Taǵy bir týysy marqumnyń psıhıkalyq aýrýy bar, sondyqtan ony ádeıi óltirýge sebep joq ekenin jetkizgen.
Túrkııa prezıdenti Rejep Taıyp Erdoǵan kóńil aıtyp, kisi óltirýshiler «24 saǵat ishinde» tabylatynyn málimdedi.
Atys bolǵan shirkeý XIX ǵasyrda salynǵan jáne Ystanbuldyń eýropalyq bóligindegi Bosfor mańynda balyq bazarynyń janynda ornalasqan.
Qala meri Ekrem Imamoǵly H áleýmettik jelisinde (burynǵy Twitter) bylaı jazdy:
«Biz eshqashan qalamyzdaǵy dinı nysandarǵa shabýyl jasaý arqyly birligimiz ben beıbitshiligimizdi buzýǵa tyrysatyndardyń nıetin júzege asyrýǵa jol bermeımiz».
Rım Papasy Frantsısk te kóńil bildirdi.
Túrkııada hrıstıandarǵa shabýyl jasaý oqıǵalary óte sırek kezdesedi.
Imamoǵlynyń aıtýynsha, munda musylmandar men hrıstıandar tatý turady jáne jergilikti turǵyndar bul jaǵdaıdan qatty shoshyp qalǵan.