Ispanııada jergilikti ókildi organdarǵa saılaý ótedi
10:51, 28 Mamyr 2023
MADRID. QazAqparat - Búgin Ispanııada eldiń 17 avtonomııalyq birliginiń 12-sinde jergilikti parlamentterge saılaý ótedi, dep habarlaıdy QazAqparat.
Sonymen qatar, barlyq mýnıtsıpalıtetterde jergilikti bılik organdarynyń quramy anyqtalady. Baspasózdiń habarlaýynsha, saılaý Ispanııanyń ulttyq parlamenti – Kortes Jeneraleske jyl sońynda ótetin aldaǵy saılaý turǵysynan qyzyq.
Ispanııadaǵy 2019 jylǵy sońǵy jalpy saılaýdan beri 1,5 mıllıonnan astam adam zańdy túrde 18 jasqa toldy, dep habarlaıdy Euractiv eýropalyq basylymy.
Kezekti jalpy saılaý qarsańyndaǵy partııalardyń kópshiliginiń baǵdarlamalarynyń ortalyǵynda qazirgi ýaqytta Ispanııa betpe-bet kelip otyrǵan áleýmettik jáne ekonomıkalyq problemalar jatyr.
Kóptegen sarapshylar jergilikti saılaý Ispanııanyń qazirgi premer-mınıstri Pedro Sanchestiń solshyl koalıtsııasynyń tanymaldyǵynyń kórsetkishi bolady dep esepteıdi.