Ispanııada toqtaýsyz jaýǵan qardyń saldarynan eldegi kólik júıesi tolyq toqtady

MADRID. QazAqparat - Ispanııadaǵy toqtaýsyz jaýǵan qalyń qardyń saldarynan úsh adam qaza tapty, eldegi kólik júıesi tolyq toqtap qaldy. Áýe jáne temirjol qatynasy jabyldy, dep habarlaıdy QazAqparat Euronews-ke silteme jasap.

Ispanııa astanasyna jaqyn mańdaǵy joldarda qar qursaýynda qalǵan kólikterdi shyǵarý úshin tótenshe jaǵdaılarǵa qarasty áskerı bólimsheler tartyldy.

Qar áli tolastamaǵandyqtan Madrıdtiń Barahas áýejaıy barlyq reısti toqtatty. Kóptegen jolaýshy áýejaıda túneýge májbúr boldy.

Kólik basqarmasynyń málimdeýinshe, qalyń qar eldegi negizgi 400 joldaǵy kólik qozǵalysyna kedergi keltirgen.

Bıliktiń úıden shyqpaý kerektigi jónindegi úndeýine qaramastan Madrıd turǵyndary tabıǵattyń sırek qubylysyn tamashalaý úshin kóshede júr. Óıtkeni qalada mundaı qalyń qar sońǵy ret 1971 jyly jaýǵan.

Madrıd pen oǵan jaqyn kentterdegi mektep jáne ýnıversıtetter aldaǵy dúısenbi jáne seısenbi jumys istemeıtin boldy.

Ispanııadaǵy 50 provıntsııanyń 36-sy qarǵa baılanysty tótenshe jaǵdaı jarııalady. Katalonııa men Kastılııa-La-Manchada aýyr júk kólikteriniń júrisi shekteldi. Sondaı-aq eldegi birqatar óńirde elektr qýaty óship qalǵan.

Foto/REUTERS -GETTY IMAGES