Ispanııada qazaqstandyq kásipker kóz jumdy

NUR-SULTAN. QazAqparat – Ispanııada qazaqstandyq azamat kóz jumdy. Bul jaıly QR SІM resmı ókili Aıbek Smadııarov málim etti, dep habarlaıdy QazAqparat tilshisi.

Ispanııalyq Eldia.es basylymy 53 jastaǵy kásipkerdiń Alıkantedegi vıllalardyń birinde kóz jumǵanyn habarlaǵan bolatyn.

«Er adamnyń denesin seısenbi kúni keshke baǵban taýyp, habar bergen. Ol jedel járdemdi, sondaı-aq azamattyq kúzet pen jergilikti polıtsııanyń birneshe patrýlin shaqyrǵan. Er adamnyń qaıtys bolǵanyn bilgen mamandar istiń mán-jaıyn eskere otyryp, tergeýshilerdiń kelýin talap etken. Marat Sabalaqovtyń denesi baspaldaqtyń astynda etpetinen jatqan. Sondyqtan bir nusqa boıynsha, ol qulap qaıtys bolýy múmkin. Alaıda qaraqus tusyndaǵy soqqydan kelýi múmkin jaraqat, sondaı-aq qan belgisiniń úı ishinde de bolýy – qylmys bolýy múmkin ekenin joqqa shyǵarmaıdy», - dep habarlaıdy basylym.

Al taǵy bir ıspandyq diarioinformacion.com saıty Marat Sabalaqovtyń qazasy qylmystan emes, oqys jaǵdaıdan bolǵanyn jazady.

QR Syrtqy ister mınıstrligi Ispanııada Qazaqstan azamatynyń qaıtys bolǵanyn rastap otyr.

«Ispanııa polıtsııasy Qazaqstan azamatynyń kóz jumǵanyn habarlady. Sondaǵy konsýl istiń mán-jaıyn anyqtaý úshin oqıǵa ornyna attandy», - dep habarlaıdy QR SІM resmı ókili Aıbek Smadııarov.