Ispanııada bir rettik plastık quty men qaptamany qoldanýdy shekteıtin zań shyqty

ASTANA. QazAqparat – Ispanııada azyq-túlik pen sýsyndardy salmaǵy men lıtrin ólshep satatyn barlyq saýda núktelerin tutynýshylardyń óz ydystaryna salyp nemese quıyp berýdi mindetteıtin jańa zań kúshine endi, dep habarlaıdy QazAqparat Euronews-ke silteme jasap.

Mundaǵy maqsat – bir ret qoldanylatyn plastık qaptamalardy paıdalanýdy azaıtý.

«Eger tutynýshy qalap tursa, alǵan taýardy ózi ákeletin ydysqa salyp jatyrmyz. Esh qıyndyq joq! Aldymen ydysyn ólsheımiz, sodan keıin olar qansha ónim qajet bolsa, sonsha alady», - deıdi shaǵyn dúkenniń ıesi. Onyń klıentteriniń biri azyq-túlik dúkenine barǵanda ózimen birge únemi birneshe sómke alyp júretinin aıtty.

Ispandyq dıstrıbıýtorlar, ózine-ózi qyzmet kórsetetin dúkender jáne sýpermarketter qaýymdastyǵy (ASEDAS) qaptamanyń taza bolýy kerektigin eske salyp, azyq-túlik salýǵa kez kelgen konteıner jaraı qoımaıtynyn eskertýde.

«Sýpermarketter, eger konteıner qolaıly emes dep eseptese, tutynýshy ákelgen ydystan bas tarta alady. Ár kompanııanyń óz talaptary bolady», - dep túsindirdi ASEDA azyq-túlik qaýipsizdigi bóliminiń basshysy Marııa Martınes Errera.

Ispandyq satyp alýshylardyń jartysy derlik bul bastamany qoldap otyr, biraq endi ónimniń qaýipsizdigine tutynýshylar da jaýapty.

Sýpermarketterdiń jańa zańnamaǵa beıimdelýi úshin alty aı ýaqyty bar.