Ispanııa men Portýgalııada qatty qurǵaqshylyq bolyp jatyr

NUR-SULTAN. QazAqparat – Portýgalııada jaýyn-shashyn jaýmaǵandyqtan, sońǵy 20 jylda bolmaǵan qurǵaqshylyq tirkeldi. El bıligi osyǵan baılanysty jedel sharalar qabyldap jatyr, dep habarlaıdy QazAqparat euronews agenttigine silteme jasap.

El ortalyǵyndaǵy sý qoımalary qurǵap jatyr, fermerler men jergilikti halyq alańdaýly. Zezere ózeniniń jaǵalaýy tartylyp qaldy. Eldegi elektr energııasynyń 30%-y sý elektr stantsııasynda óndiriledi, qazirgi kezde bes stantsııadaǵy óndiris toqtap tur.
Budan buryn atalǵan aýdan 2017 jyly bolǵan orman órtiniń zardabyn shekken.
Sonymen qatar qurǵaqshylyqtan kórshiles Ispanııa da zardap shegýde. Qańtar aıynda bul elde jaýyn-shashyn normasynyń tórtten biri ǵana jaýdy. Keıbir aýdandarda aýyl sharýashylyǵynyń qajettiligine arnalǵan rezervýarlarda sý tapshylyǵy baıqalady, olar 45%-ǵa ǵana tolǵan. Galısııa provıntsııasynda sý qoımasynyń astynda ótken ǵasyrda sýǵa batqan aýyl kórine bastady.
Ǵalymdardyń aıtýynsha, bul qurǵaqshylyq – klımattyń ózgerýi saldarynyń biri.
Meteorologtar jaqyn kúnderi jaǵdaı jaqsarmaıtynyn eskertti. Portýgalııa men Ispanııa úkimetteri daǵdaryspen kúresý úshin kúsh biriktirýge uıǵardy.