Ispanııa men Kanadada órtke baılanysty myńdaǵan adam úıin tastap ketýge májbúr boldy

SANTA-KRÝS-DE-TENERIFE. QazAqparat – Ispanııanyń Tenerıfe aralynda órtke baılanysty myńdaǵan adam úılerin tastap ketýge májbúr boldy. Kanadanyń soltústik jáne batys aımaqtaryndaǵy ormandar órtenip, turǵyndar jappaı evakýatsııalap jatyr. Bul týraly QazAqparat Euronews agenttigine silteme jasap habarlaıdy.

Tenerıfede órt saldarynan 26 myń adam úılerin tastap ketýge májbúr boldy. Órttiń sharpyǵan aýmaǵy – 5 myń gektar jer. Kúshti jel men tómendemeı turǵan temperatýra saldarynan órt tez tarap jatyr.

Mundaı taýly aımaqta qyzyl jalynmen kúresý óte qıyn. Órtti áýeden ushaqpen sóndirýge býdaqtaǵan tútin kedergi keltiredi. Eki táýlik ishinde Ielloýnaıfta 19 myń adam evakýatsııalandy. Bul – Kanadanyń soltústigindegi qalanyń barlyq turǵynyna jýyǵy. Olardyń 15 myńy jalyn sharpyǵan aımaqtan avtokólikpen ketse, 3 800 turǵyn áýe arqyly evakýatsııalanǵan. Adamdardy kórshiles provıntsııalar qabyldap, qonaqúılerge ornalastyryp jatyr.

Jalynmen kúresýge 300 órt sóndirýshi jumyldyrylǵan. Kanada tarıhynda órt eń kóp bolǵan osy maýsym kezinde 14 mıllıon gektar jer órtenip ketken. Bul 1989 jylǵy rekordtan eki ese kóp. Al maýsym áli aıaqtalǵan joq.