Ispanııa men Frantsııa shekarasyndaǵy orman órtendi

NUR-SULTAN. QazAqparat – Ispanııa men Frantsııa shekarasyndaǵy orman órtenip jatyr, dep habarlaıdy QazAqparat Euronews-ke silteme jasap.

Ispanııanyń Navarra avtonomııalyq qaýymdastyǵyna qaraıtyn Bera men Lesaka qalalaryndaǵy orman órti taıaý mańdaǵy Bask eli óńirine jáne Frantsııa shekarasyndaǵy aýdandarǵa taraldy. Kóptegen týrıst atalmysh aýdannan qaýipsiz jerge kóshirildi. Ormandy sóndirýge 200-ge jýyq órt sóndirýshi jumyldyrylǵan.

Aqpan aıy burynǵysynan jyly bolǵandyqtan jáne jyldamdyǵy saǵatyna 100 shaqyrymǵa jetetin jel de órttiń tez taralýyna sebepshi bolýda.

Senbi keshke ǵana órttiń taralýy shekteldi, biraq jaǵdaı áli de aýyr. Jel azdap saıabyrlady, sonda da qutqarýshylar jumysyna kedergi keltirip otyr. Ispanııa men Frantsııa órttiń shyǵý sebebin tekserýge kiristi.

Frantsııanyń Atlant Pıreneı departamentinde fermerlerge qurqaq shópti órteýge tyıym salyndy.