Ispanııa bıligi Shakırany ekinshi ret aıyptady

<p>Kolýmbııalyq ánshi Shakıra biraz ýaqyt turǵan Ispanııa bıligi ony salyq tóleýden jaltarǵany úshin ekinshi ret aıyptap otyr. <a href="https://kaz.inform.kz/" target="_blank" rel="noopener">QazAqparat</a> bul týraly <a href="https://www.bbc.com/russian/articles/c1094vv65g1o" target="_blank" rel="noopener">VVS </a>basylymyna silteme jasap habarlaıdy.&nbsp;</p>

Ispanııa prokýratýrasynyń aıtýynsha, ol 2018 jyly óziniń álemdik El Dorado týry úshin memleketke 6,7 mln eýro (shamamen 7 mln dollar) tólemegen, sondaı-aq basqa tabysyn jasyryp qalǵan.

Bılik ókilderiniń aqparaty boıynsha, 2018 jyly Shakıra Ispanııa salyq rezıdenti boldy. Sebebi sol kezde burynǵy jigiti, fýtbolshy Jerar Pıkemen Barselonada turyp jatqan bolatyn.

Bul iske qatysty tergeý shildede bastalǵanymen, seısenbi kúni ǵana egjeı-tegjeıli jarııalandy.

RTVE telekompanııasynyń aıtýynsha, 46 jastaǵy ánshi jańa aıyptaýlardan habardar. Biraq Shakıranyń qazir turyp jatqan Maıamıdegi zań komandasy 20 qarashada bastalyp, 2012-2014 jyldardy qamtıtyn birinshi is boıynsha sot protsesine daıyndalyp jatyr, dep habarlady Reuters.

Bul iste ol 2012 jyldan 2014 jylǵa deıingi aralyqta 14,5 mln eýro salyq tólemedi dep aıyptaldy.

Ispan bıliginiń aıtýynsha, Shakıra Ispanııa salyq rezıdenti bolǵan kezde barlyq tabysynan salyq tóleýi kerek edi. Biraq onyń ornyna ánshi olardy «salyq mólsheri men ashyqtyǵy tómen» elderde tirkelgen kompanııalarǵa jiberip otyrǵan.

«Meniń durystyǵymdy rastaıtyn dálel jetkilikti ekenine senimdimin jáne ádildik meniń jaǵymda bolady dep oılaımyn», - dedi Shakıra jaqynda bergen suhbatynda.