Ispanııa 12 jyldan keıin Eýropa chempıonatynyń fınalyna shyqty
Jankúıerler Ispanııa men Frantsııa kezdesýin asyǵa kútkeni anyq. Kileń juldyzdar jınalǵan qos quramanyń qaısysynyń baby kelisip, baǵy basym bolady degen saýal kópshilik kókeıinde turdy.
Sondaı-aq jankúıerdi aty tanymal Kılıan Mbappe men jas juldyz Lamın ıAmal arasyndaǵy kezdesýde kimniń joly bolatyny qyzyqtyrdy.
Oıyn birden-aq shabýylmen bastaldy. Frantsııalyq Kılıan Mbappeniń áýelete bergen pasyn áriptesi Randal Kolo Mýanıge baspen qaqpaǵa baǵyttap, óz quramasyn alǵa shyǵardy.
Aıta ketsek, Kılıan Mbappe qurlyqtyq dodadaǵy alǵashqy nátıjeli pasyn shyǵaryp berdi.
Ispanııalyq fýtbolshylar kóp uzamaı tarazy basyn teńestirip ketti. Nebári 16-jastaǵy Lamın ıAmaldyń alystan baǵyttaǵan doby Frantsııa qaqpasynyń torynda týlap jatty. Osylaısha ol atalǵan týrnırdiń tarıhynda 1/2 fınalda gol soqqan eń jas oıynshy atandy.
Al 25-mınýtta ıspanııalyq Danı Olmo kózdegen nysanadan múlt ketken joq.
Osylaısha Ispanııa qarsylasyn 2:1 esebimen jeńip, 12 jyldan keıin fınalǵa joldama aldy.
Endi 11 shildede taǵy jartylaı fınalda Anglııa men Nıderland quramalary kezdesedi.
Eýropa chempıonaty 1960 jyldan beri uıymdastyrylyp keledi. Qazirge deıin Germanııa, Ispanııa 3, Italııa, Frantsııa 2, KSRO, Portýgalııa, Chehoslovakııa, Nıderland, Danııa men Grekııa 1 retten jeńis tuǵyryna kóterildi.
Eske salsaq, búgin Amerıka kýbogynda Argentına men Kanada quramalary kezdesedi.