Islandııada qaıtadan janartaý atqylaı bastady

<p>ASTANA. KAZINFORM — Islandııanyń ońtústik-batysynda, Reıkıanes túbeginde janartaý atqylaýy bastaldy, sonyń saldarynan ataqty geotermaldyq kýrort Kógildir lagýna men Grındavık shaǵyn qalasyn evakýatsııalaýǵa týra keldi, dep habarlaıdy <a href="https://www.bbc.com/russian/articles/cevvgzygg4go" target="_blank" rel="noopener">VVS.</a> </p>

Bul — osy aýdanda jeltoqsan aıynan beri janartaýdyń besinshi atqylaýy.

Tótenshe jaǵdaı jarııalandy, biraq bul Islandııaǵa ushatyn áýe reısterine áser etpeıdi dep shamalanyp otyr.

Grındavık meri Fannar Ionasson RUV memlekettik telearnasyna qalaǵa qaraı aǵyp jatqan lavanyń kólemine alańdaıtynyn málimdedi.

Onyń aıtýynsha, lava kólemi sońǵy atqylaý kezinde baıqalǵannan áldeqaıda kóp.

Jergilikti elektr jetkizýshisi HS Veitur habarlaýynsha, saqtyq sharasy retinde Grındavıkte elektr jaryǵy óshirildi.

Jergilikti BAQ-tyń habarlaýynsha, úsh adam qaladan ketýden bas tartqan.

Keıinirek sheneýnikter qalada nemese oǵan jaqyn jerde qalǵan kez kelgen adamdy aımaqty tastap ketýge shaqyratyn málimdeme jasady.

Qazir qalaǵa kirip-shyǵatyn joldardyń bireýinen basqasynyń barlyǵyna qatynaý múmkin emes ekeni habarlandy.

Sońǵy ret Reıkıanes túbeginde uzaqqa sozylǵan janartaý belsendiliginiń kezeńi 800 jyl buryn boldy, onda atqylaý ondaǵan jyldar boıy jalǵasty.