Islambek Saljanov búlik saldary týraly: Barlyq kásipkerlerdi kómektesýge shaqyramyn

NUR-SULTAN. QazAqparat – Belgili metsenat, «Altyn Qyran Foundation» qoǵamdyq qory qamqorshylyq keńesiniń tóraǵasy Islambek Saljanov kásipkerlerdi zardap shekken ǵımarattardy qalpyna keltirýge kómektesýge shaqyrdy, dep habarlaıdy QazAqparat.

«Elimiz úshin bul qaraly kúnderi men, azamat jáne patrıot retinde, barsha qazaqstandyqtardy, ásirese jastardy, provokatsııalarǵa shaldyqpaı, zań jáne qoǵamdyq tártipti saqtaýǵa shaqyramyn. Barlyq otandastardy birlesip, el egemendigin jáne Táýelsizdigin birge qorǵaýǵa shaqyramyn.Otan aldynda qyzmettik boryshyn oryndaý kezinde terrorıster qoldynan jaqyndary men týystary ómirleri qıylǵan barlyq otbasylarǵa kóńil aıtamyn», - dep jazdy I. Saljanov óziniń Facebook-tegi paraqshasynda.

Óz sózinde I. Saljanov elimiz úshin kúrdeli kezeńde Prezıdent, Joǵarǵy bas qolbasshy Qasym-Jomart Toqaev ózine tolyq jaýapkershilikti alyp, ishten jáne syrtta daıyndalǵan destrýktıvti kúshter tarapynan terrorıstik agressııany toqtatqanyn eske saldy.

«Barlyǵymyz biletindeı, búgin eldiń barlyq óńirlerindegi jaǵdaı Prezıdenttiń jeke baqylaýynda. Biz, Qazaqstan azamattary retinde, Memleket basshysy aınalasyna birigip, tez arada tártiptiń qalpyna kelýi men beıbit ómirge oralýda qoldaýymyz kerek.

Qazaqstannyń barlyq kásipkerlerin vandaldar qıratqan ákimshilik jáne áleýmettik ǵımarattardy tez arada qalpyna keltirýge kómektesýge shaqyramyn. Osy qaraly kúnder artta qalyp, Qazaqstanda ádildik jáne árbir azamattyń ál-aýqaty basty maqsat bolatyn, gúldenýdiń jańa kezeńi bastalýyna kámil senemin», - dedi Islambek Saljanov.