Islam elderinde jemqorlarǵa qandaı jaza qoldanylady

NUR-SULTAN. QazAqparat – Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly ıslam elderinde jemqorlarǵa qandaı jaza qoldanylatyndyǵyn aıtty, dep habarlaıdy QazAqparat tilshisi.

«Islam memleketi nemese ıslam memleketi emes dep bólýge de bolmaıtyn shyǵar. Óıtkeni, árbir memlekette jemqorlyq úlken kúná bolyp sanalady. Barlyq memlekette jaza qatal. Elimizde de Memleket basshysy Qasym-Jomart Toqaev jemqorlyqpen sottalǵan adamdardyń jazasyn óteý merzimin qysqartý bolmaıtyndyǵyn aıtty. Bul da elimizdegi jemqorlarǵa jazanyń qatańdyǵyn kórsetedi. Al musylman elderinde darǵa asý jazasy qoldanatyndar bar. Keıbir elde qol kesý jazasy qoldanylady. Myna kórshi Qytaı elinde de jemqorlyqqa jaza óte qatań. Sondyqtan ıslammen ǵana ólsheýge bolmas. Barlyq jerde óz eliniń damýyna qarsylarǵa zań qatań deýge bolar» - dedi QMDB tóraǵasy QR Sybaılas jemqorlyqqa qarsy is-qımyl agenttigi alańynda ótken brıfıng barysynda.

Osy oraıda Bas múftı Allaǵa sengen, ımandy adam jemqorlyqqa barmaıtyndyǵyn basa aıtty. Sonymen qatar ol Qazaqstan musylmandary dinı basqarmasy óz jumysynda birneshe baǵytqa basymdyq beretindigin, onyń biri rýhanı ilim beretin Ihsan baǵyty ekendigin atap ótti.

«Ihsan ilimi boıyna sińgen adam jemqorlyqqa jolamaq túgili onyń atyn da estýge jırenetin bolady. Ihsan búgin ǵana paıda bolǵan termın emes. Ol musylmandyq joldy ustanǵan qazaq halqynyń baǵzy zamannan jaqsy meńgergen joly», - dedi Naýryzbaı qajy Taǵanuly.