Islam damý banki Qazaqstanmen yntymaqtastyqty keńeıtýge daıyn

ASTANA. QazAqparat - Qazaqstannyń Saýd Arabııasyndaǵy Elshisi Berik Aryn shtab-páteri Jıdda qalasynda ornalasqan Islam damý bankiniń prezıdenti Muhammed ál-Djassermen kezdesti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Kezdesý barysynda qazaqstandyq dıplomat IDB basshysyna Qazaqstan Prezıdenti Qasym-Jomart Toqaevtyń bıylǵy 8-9 maýsymda ótkizilýi josparlanǵan Astana halyqaralyq forýmyna qatysýǵa shaqyrý hatyn tabys etti.

Elshi bul alań álemdik ekonomıkanyń ózekti máselelerin talqylaýǵa jáne jahandyq naryqtyń damýy men turaqtylyǵyna baǵyttalǵan jańa ıdeıalar men bastamalardy usynýǵa arnalǵan mańyzdy shara bolyp tabylatynyn erekshe atap ótti.

Qazaqstan men IDB arasyndaǵy ekijaqty yntymaqtastyqty talqylaı kele, B. Aryn suhbattasynyń nazaryna qazaqstandyq taraptyń iri ıslamdyq qarjy ınstıtýtymen ózara tıimdi yntymaqtastyqty odan ári keńeıtýge jáne nyǵaıtýǵa daıyndyǵyn jetkizdi.

Sonymen qatar, qazaqstandyq dıplomat IDB prezıdentin Memleket basshysynyń Jańa jáne Ádiletti Qazaqstandy qurý jónindegi bastamasyn júzege asyrý aıasyndaǵy elimizdegi reformalardyń barysy týraly habardar etti.

Atap aıtqanda, Elshi jaqynda ótken parlamenttik saılaý jáne Qazaqstannyń jańa Úkimetin qurý úderisteri memlekettik negizgi ınstıtýttardy qaıta jańartýdyń sońǵy kezeńi bolǵanyn jáne onyń qorytyndysy boıynsha Qazaqstan óz damýynyń jańa kezeńine aıaq basqanyn atap ótti.

IDB basshysy shaqyrýdy rızashylyqpen qabyldap, forýmǵa qatysý úshin bar kúsh-jigerin salatynyna sendirdi. Ol elimizde júrgizilip jatqan reformalardy joǵary baǵalap, Qazaqstan Ortalyq Azııa aımaǵyndaǵy banktiń negizgi seriktesi ekenin atap ótti. Osy turǵyda M. ál-Djaser IDB-niń Qazaqstanmen yntymaqtastyqty odan ári keńeıtýge daıyn ekenin rastady.