Islam damý banki Qazaqstandaǵy ınfraqurylymdyq jobalardy qoldaýǵa shamamen $2 mlrd bóledi

<p>ASTANA. KAZINFORM &ndash; OPEC halyqaralyq damý qory uıymdastyrǵan forýmda Qazaqstan Respýblıkasy Premer-Mınıstriniń orynbasary &ndash; ulttyq ekonomıka mınıstri Nurlan Baıbazarov Arab koordınatsııalyq tobyna kiretin ıslam damý ınstıtýttarymen birqatar ekijaqty kezdesýler ótkizdi.</p>

Sondaı-aq, Qazaqstan Respýblıkasynyń Úkimeti men Islam damý banki arasyndaǵy negizdemelik baǵdarlamalyq kelisimge qol qoıdy, dep habarlaıdy Úkimettiń baspasóz qyzmeti.

Kelisim bıyl sý sharýashylyǵy jáne kólik salalaryndaǵy ınfraqurylymdyq jobalardy júzege asyrý úshin uzaqmerzimdi ınvestıtsııalar tartý týraly buǵan deıin qol jetkizilgen kelisimderdi bekitti. Osy maqsatta Islam damý banki $2 mlrd deıin qarjy bóledi.

Sý resýrstary jáne ırrıgatsııa mınıstrligi bıyl qarjylandyrýǵa daıyn 16 jobany daıyndady. Olardyń ishinde sý qoımalaryn, bógetterdi, ırrıgatsııalyq kanaldardy, kontrretteýshilerdi jáne ilespe ınfraqurylymdy salý jáne rekonstrýktsııalaý jobalary bar. Kólik mınıstrligi uzyndyǵy 500 shaqyrymnan astam respýblıkalyq mańyzy bar avtojoldardy rekonstrýktsııalaý jáne salý boıynsha 4 jobany usyndy.

Kelisim tabysty iske asyrý jáne alǵa qoıylǵan maqsattarǵa qol jetkizý úshin birlesken jobalardyń oryndalý barysyna turaqty konsýltatsııalar men monıtorıng júrgizýdi kózdeıdi.